係，冇辦法唔又寫超人檔3仔！因為佢哋終於做咗一樣令華華覺得最ichiban嘅嘢，就係將日本嘅i-mode引入香港同馬交，約莫今年尾，大家就唔使再淨係響新宿條電器街度，望住啲又潮又靚嘅i-mode手機流口水。
為咗隆重其事，3仔噚日仲特登搵埋i-mode之父──夏野剛嚟香港整番個結盟儀式，除咗畀大家見識吓日式點睛儀式係點，順便畀大家睇一睇，夏野剛嘅應對能力有幾耍家！
同霍大班行埋咗
呢位TAKESHISan話，7年前發明i-mode嗰陣，除咗佢自己，冇人相信會成功，當中包括佢嘅前度CEO……咁i-mode點解同和記合作呢，又？佢話今年2月同阿霍大班建寧見過一次面，亦係第一次見面，就係咁大家就行埋咗……
差啲唔記得講番個點睛儀式，拿，圖中個公仔相信大家行日本百貨公司成日都會見到，呢個公仔叫做DARUMA，冇中文名嘅，係啲日本人同人結盟嗰陣，送畀partner嘅。
咁雙方響簽約嗰陣，大家首先會為個公仔點一隻睛先，到稍後服務或者產品推出嗰陣，先至畫埋另一隻。假如一切順風順水嘅話，個公仔應該響今年第4季就有齊一對眼喇。
李華華
讀者如有任何意見或報料，歡迎發送電郵至[email protected]。