昨日中國銀行（3988）首日掛牌升15.3％，表現實在超乎小初所料，本來諗住低位買多啲無法實現。散戶一人一手個個有錢賺，雖然數目唔係多，但點都係好事一宗。
另一方面，大市急跌212點，又確係令人有多少憂心，莫非真係要提早離場，坐喺屋企等睇世界盃？
計落呢期有唔少基金股，唔覺唔覺已經跌咗好多，例如一直有證券行唱好的中國燃氣（384），近期股價走勢肉酸得緊要，就算董事入市增持都無補於事。
據講有分析員最近見過中國燃氣管理層，跟住話中國燃氣兩個月後所公布的06年盈利，未必好似之前預期咁靚，所以大幅調低隻股的評級同埋目標價。
其實人哋兩個月後先至出業績，咁早就出定預測，真係有先見之明得交關。
中國燃氣昨日收1.15元，大跌10.85％，接近52周低位，成交6084萬股，金額7103萬元。
慕容小初