可能唔少人會覺得，地產代理細行比大行多啲人情味，但大行服務就好似專業啲，會跟足法例冇咁求其。其實政府立例監管咗代理行業咁多年，好多細行嘅工夫都做得好足，班員工唔會得過且過，自我增值理念仲好強。
世紀21一直搞開持續進修計劃課程，系內細行參與率不斷提高，好似早輪嘅「填寫租約竅門」課程，50個學員中，三分一係細行職員，比今年1月中另一課程多咗三成。
培訓部經理馬志權話，今次課程針對市場租務交投活躍，特意開班講解租務條例、同埋日常運作上嘅重點，更加入即場填寫租約嘅環節，透過活學活用去加深學員嘅吸收力。原來互動教學唔淨只小朋友啱用㗎。
另外，香港置業嘅專才培訓中心，早兩日搞咗個講座，由奧運站高級區域經理鍾坤文主講，傳授佢入行近十年嘅經驗同銷售技巧。成功人士嘅說話，點都畀啲只講理論嘅嚟得有說服力。