老牌記者L有一次喺西環過馬路，有一位男士行埋嚟叫佢：「L哥，你好嗎？我啱啱俾人打咗荷包，好唔掂，請你幫幫忙……」L哥乃老實人，心地好，俾男士纏咗一輪，卒之送三百蚊畀呢位男士。太平紳士S先生原來亦碰過一位男士，故事如出一轍。不過S先生挑通眼眉，唔肯畀現錢，只畀咗卡片佢，叫佢上公司面試，畀份工佢做。男士當然冇如期露面啦。
好嘞，呢位男士食得禾米多，再度纏住一位曾送錢畀佢使嘅好人，好人一眼就認得佢，立即報警拉人，成為新聞。於是老牌記者L哥與S先生都知道大家碰見過嘅，就係呢位嫌疑犯，L哥大嘆好人難做，S先生就話社會上有人靠呃搵食，不可不防。正因為一粒老鼠屎就搞臭一鍋粥，一啲少數壞人就拖累到真係值得同情嘅人冇人可憐。
S先生某月某日在北角街頭斑馬線前等過馬路，有一架的士將近駛到斑馬線，突然煞掣，說時遲，那時快，同一時候一位阿婆走出馬路。如果的士唔煞掣得切，就會撞到阿婆。但係阿婆仍然向的士車頭仆過去，跟住跌落地上。的士停定，司機落車睇阿婆，有途人大聲嗌話報警，跟住一男一女，年紀比較輕嘅，走出馬路，話係倒地阿婆嘅仔與新抱，要求的士司機賠償。警察隨後趕到，男女話要拉個司機。S先生睇到唔抵得，行埋去同警察講：「我係太平紳士，我目睹事件，如果你要我作證，呢張係我卡片，我認為的士司機已經睇到有人走出馬路，一早煞車，阿婆跌落地，唔關佢事！」
過咗一排，警方通知S先生，嗰單案已經撤銷，警方認為的士司機冇事，司機想話親自多謝S先生喎。S先生唔肯見司機，以免人哋千多萬謝。
如果S先生唔係太平紳士，警察會唔會當佢冇到呢？S先生話：「我係唔抵得某些人做戲啫，所以盡吓公民責任，當然，太平紳士嘅說話，係有份量啲嘅。」香港有唔少太平紳士，希望佢哋個個都隨時隨地盡一份公民責任，挺身而出，為好人做證。