今日已經係孫柏文第3次寫關於「巴士阿叔」嘅文章。第1、2次講「巴士阿叔」，係喺兩個禮拜前，即係5月17同18日。我記得，當日問過大家知唔知道「有壓力」、「未解決」、「挑釁我」等詞彙嘅特別解釋，仲問大家知唔知道邊個係「巴士阿叔」。當日，我仲好好心咁，教大家點樣睇段短片，就係可以去youtube.com，跟住用以下嘅詞彙：「巴士阿叔」、「林尚義」、「巴士」、「阿叔」，去搵呢段片。
眨吓眼，「巴士阿叔」呢段6分鐘長嘅短片，喺呢兩個禮拜之內，由一個青年人嘅小眾趣味、老人家完全唔識嘅網上短片，變成香港最暢銷報紙、雜誌嘅封面、頭條。我相信未來將繼續會有大學教授、社會工作者、傳媒研究員、文化界自稱嘅「精英」、財經口水佬去分析、分析、再分析呢個現象，當然包括孫柏文在內。不過，今日真係諗唔到新角度去再分析「巴士阿叔」。
阿叔現身上達巔峯
各位《金手指》fan屎可能會問：「如果孫柏文諗唔到新角度去再分析「巴士阿叔」，咁點解今日要再講佢呢？」其實今日寫「巴士阿叔」嘅原因，係因為要履行我向《利字當頭》一欄總舵主利世民兄嘅承諾。呢2、3個禮拜，我同世民兄反反覆覆都傾過關於「巴士阿叔」現象嘅問題，多達數10次。其中1次，我就比喻「巴士阿叔」現象為一個投資項目泡沫，當時我曾經預言，話呢個泡沫爆破嘅一刻，就係最代表主流嘅報章、雜誌都攞佢做頭條。當時，世民兄只係反問我一句：「真係做到頭條？」
上頭條係爆破訊號
孫柏文就答：「唔知得唔得，不過如果真係做到頭條，『巴士阿叔泡沫』亦都會到達巔峯，繼而爆破。仲有，要做頭條，就一定要係個高潮，而唯一可以做到呢個高潮嘅，就係『阿叔』現身。佢一日唔現身，一日都未到高潮，而『巴士阿叔泡沫』可以一路繼續玩落去。」
世民兄：「我話未必，就算『阿叔』現身，照理『巴士阿叔』個現象應該可以繼續紅落去。不過你真係咁sure？有幾sure先？」
孫柏文：「Sure，非常sure。Sure程度高到可以向全世界講我呢個『巴士阿叔泡沫爆破論』。如果『阿叔』真係現身，報紙攞佢做頭條，我就即刻同全世界講『巴士阿叔泡沫爆破』啦！」所以今日《金手指》個題，就係咁起，所以今日就算冇新角度去再分析「巴士阿叔」都要再講佢。不過，呢個泡沫同股票泡沫一樣，正當報紙頭條都講股票嘅時候，就係大家要出貨嘅一刻。
孫柏文