香港歷史上最多人贏錢嘅一日係邊日？就係噚日。多得偉大祖國關照，將國家四大銀行之一嘅中國銀行放嚟特區上市，結果$2.95招股，一掛牌就$3.4，九十幾萬股東除咗少數高息借孖展者外，相信絕大部份有錢落袋。大戶肥仔，小戶揸住一手都搵到餐晏。
八方冇買中行，冇錢贏，不過一樣好開心，事關呢類成功嘅商業活動，正正話畀大陸同胞知香港呢個特區嘅真正價值所在；所以噚日由上晝去交易所睇佢哋掛牌到傍晚去香格里拉佢哋個慶功酒會，由朝跑到晚都冇所謂。
猛人齊賀金融大日子
事關好多達官貴人亦一樣咁頻撲，好似上晝十點個掛牌儀式，金管局任志剛總裁、東亞銀行主席兼行會成員李國寶、新任港交所主席又係行會成員嘅夏佳理一早就到。到傍晚，喺酒會又見到佢哋，唔知中行開完酒會上39樓食飯有冇請埋三位？如果有，佢哋噚日就真係「中國銀行日」。
除咗佢哋，噚日去捧中行場嘅猛人真係多到無輪。八方現場數一數，有李嘉誠、鄭裕彤、馮國經、胡應湘、陳廷驊、田北俊、羅康瑞、呂志和、周松崗、蘇澤光、范鴻齡、小吉方黃吉雯……當然唔少得剛剛在澳洲趕返香港嘅財神爺，特區金融史上嘅大日子，又點可以冇咗唐唐呢？
咁中行方面亦非常大陣仗，以防待慢呢班貴客。佢哋大大話話出動成百個員工迎賓，早前喺中銀春茗着旗袍嘅八美，又再現身，仲有大班靚女staff招呼入場來賓。
大會男女司儀專程由北方飛落嚟，所以好有中央台味道。聽講佢哋籌備呢個大party用咗七日，總行有幾十人南下打點。
鄧小平當年批示特區50年不變，雖然畀董建華搞咗七年，曾蔭權又搞兩年，到現在十年未夠，已經變咗好多，不過鄧公另一句最高指示「股照炒」，就保持得比較好，冇乜點變質。八方噚日問中行策略股東誠哥（佢名下嘅長實和黃揸咗13.96億股中行股份）賺得滿唔滿意，佢話個收市價幾好──咁會唔會加碼買多啲？超人果然精靈：「梗係唔答你啦！」
傳真︰2623-9278
電郵︰[email protected]
