想牛肉炒得嫩滑，一般人都會加入嫩肉粉來醃製，不過食嘢最講求天然，而煮餸亦都一樣，下下都要用嫩肉粉同味精先煮得出好餸，就唔稱得上烹調嘅秘訣，所以今次就教大家用薑汁令牛肉嘅肉質變得鮮嫩。首先只要將薑片攪碎，再將薑末放入紗布中擠出薑汁，然後拌入牛肉中攪勻，在室溫下醃製約半小時，讓薑汁滲入牛肉中軟化組織，再以大火爆炒，就可令牛肉變得鮮嫩無比，食落除咗香味濃郁外，又無生薑嘅辛辣味。
其實薑係烹調過程中唔可以缺少嘅材料，不過要用得其所，就唔係人人都識。而除咗磨成汁外，一般最常用嘅還有切片、切絲、切粒或磨茸。若想去除魚腥味，就要將薑片或薑絲放上魚面蒸煮。若想食出薑嘅辛辣香味，就可以將薑米與肉碎攪勻後炒香，非常惹味。