雙胞胎是有心靈感應的。細孖衞詩與大孖衞蘭的感應力，可以去到心靈相通、同時間說出同一句話的神奇地步，她們居於同一屋簷下，但衞詩最怕大孖反鎖廁所踎塔打機，衞蘭則最懊惱細孖懶摺衫，姊妹情深卻狗咬狗骨，有愛又有恨，實在有趣。
細孖衞詩（Jill）比衞蘭（Janice）遲兩分鐘出世，但兩姊妹的外貌、聲音、身形、舉止實在激似，她們雖然同具火爆性情及共同嗜好，但在生活上，多少都有分別。據衞詩形容，衞蘭是管家婆，愛清潔整齊，有條不紊，但衞詩較隨意，有時候兩姊妹在家就為着雞毛蒜皮小事炒大鑊。
數衞蘭怪癖
日前衞詩在將軍澳接受訪問，便踢爆大孖衞蘭愛躲在洗手間打機的獨特習慣，衞詩笑說：「Janice成日攞咗我部PSP入廁所，唔畀我入去，佢唔知點解入去咁耐都唔出嚟，對上一次佢入咗廁所成個鐘頭，我敲門話真係要去廁所，好嬲呀，等咗好耐佢至肯出嚟。」
Janice霸廁所激到細孖生蝦咁跳，但衞詩一樣氣得Janice七孔生煙，衞詩說：「佢成日話我唔閂門，我有時入爹哋、Janice間房之後冇閂佢哋房門，Janice就話漏晒啲冷氣，佢講過我好多次啦。我同佢係唔可以住埋一間房，會激嬲大家，佢鍾意乾淨，同媽咪一樣，床鋪一定要摺好，衫要摺得好靚，鞋會收起。我唔會即刻做，有時趕時間，啲鞋擲喺地，諗住返屋企先執，Janice就會話我。」
盡在不言中
雖則衞蘭和衞詩偶有頂頸時候，但終歸都是姊妹情深，她們擁有雙胞胎的通心術，故所有事情都盡在不言中，衞詩說：「我哋細個時會發同一個夢，到大個咗都會feel到。有次我非常唔開心，Janice雖然嗰日唔喺我身邊，但佢知道，打畀我問我有冇事。仲有最近我哋諗住養隻狗仔，有日我哋傾電話，話如果買咗隻狗返嚟會幫佢改個乜嘢名，我哋係一齊講出同一個英文名，真係好得意。」
採訪：朱倬誼 攝影：陳偉權
化妝：江中平＠A&VMakeupschool
髮型：ZingWong＠HairCulture
服裝：Rosebullet
（綠色背心、短褲）、連卡佛
