港股近排認真搵食艱難，無論造好造淡皆好易損手。理論上，港股走勢趨跌，造淡應該贏面大，可惜是大市走勢波動，好多時睇得中都食唔到，以昨日為例，恒指先升後跌，走勢十分陰濕，周一尾市跟風造淡的醒目散戶美夢破滅，早市不少被震落車，然後眼見午市港股急插，真係心都實晒，好容易連信心同鬥志都輸埋。
此外，好多周一冇止蝕離場的散戶好友，驚足兩日後見大市居然不跌反升，又再心雄不肯計數，結果午市又再墮下深淵，懊悔不已。
散完反彈彈完再散
股市之難玩，股市之折磨人，正如韓非《說難》中所說，「知之非難，處之則難」。引用到炒股方面解釋，即係知道大市趨勢及股價升跌唔難，但何時買入及何時沽出要拿揑得準，則十分困難。
無論港股或外圍股市，感覺上是愈來愈差。美股、日股及港股5月跌勢明顯，而且往往大跌後反彈幾日，跟住再出現大陰燭插落，彈完就散，擺明是淡友正在消耗好友的剩餘購買力，好像大魚上釣後，絲線不斷收放，消耗魚兒的剩餘體力後較容易拉上水。
新地（016）昨先高後低，按部署在80元沽出計數，現時沽出有機會在低部補回，好過捱打。近日全城講「巴士阿叔」，講「壓力」，講「未解決」。在跌市中揸住股價不斷下跌的股票，其實會對投資者造成很大壓力，而不少人高估自己這方面的抗壓能力，在股價下跌初期不以為意，但眼見股價愈跌愈深，財富愈來愈縮，備受精神困擾，最後忍不住沽出。在圖表上，有不少股票在見底前都出現特大的陰燭，其實正反映以上情況。跌市中識得如何保持實力及保留主動權非常重要。
趙飛雲