萬眾期待嘅世界盃仲有幾日就開鑼，幾乎乜嘢都開始同世界盃拉上關係，上屆好多人走咗去酒吧睇直播，酒吧生意一枝獨秀，今年又點呢？
中原香港商舖部營業董事鄭琪俊透露，中環德己立街38至44號低層地下C舖，面積約2903方呎，現租客為BarGeorge，租期剛啱屆滿，新租約就大幅勁升一倍至40萬，呎租去到137.8元，租期3年。
呢個租客唔知係好彩定不幸，好彩係可以續約，唔使周圍搵舖開張，食正世界盃條水；唔好彩嘅就梗係啱啱喺世界盃開鑼前至約滿，俾業主㩒住加租啦。
業主04年6月用6100萬買入個舖，舊租回報3.9厘，𠵱家續約升到7.9厘，認真和味。聽講業主諗住放售套現，叫價9500萬，計落都畀到新買家5厘回報，開價唔算好過份。
由於今年多咗好多商場加入迎接世界盃熱潮，好似信和嘅大角嘴奧海城商場，同新地嘅觀塘apm商場，都送嘢畀到場睇波人士，肯定吸咗一大批客，酒吧生意係點，睇怕都係「摸住石頭過河」。
電郵地址：[email protected]