肥媽瑪利亞一直都喺有線娛樂台主持《肥媽私房菜》，但係因為佢嘅音樂才華，得到無綫揸弗人方逸華同總經理陳志雲賞識，游說佢加盟無綫收費電視，出任製作資源部高級經理，做音樂方面嘅工作。但係肥媽同有線到出年五月先約滿，所以早前已經公開推咗無綫嘅邀請，但馮仁昭收到風，肥媽噚日靜雞雞入咗無綫返工，有食兩家茶禮之嫌。
月薪10萬
據知，肥媽噚日朝早約10點就入咗無綫位於將軍澳嘅電視廣播城，無綫即派出人事部高層招呼佢，因為陳志雲咁啱休假，所以就改派另一高層樂易玲招呼肥媽，仲安排專人帶佢四圍參觀。馮仁昭聽講肥媽嘅酬勞非常可觀，月薪近10萬，無綫仲專登裝修間靚房畀佢坐。
馮仁昭噚日即刻致電肥媽求證，佢話：「我帶個退休公務員朋友入去見工，頂替我個位啫，咁啱喺canteen撞到何麗全同樂小姐（樂易玲）咪坐低飲杯檸檬茶，估唔到大家咁敏感，搞到我以後都唔敢再入無綫㖭！」
問肥媽有冇要求無綫等佢同有線約滿先過檔？佢話：「仲有成年，你估我係老闆，我話晒事咩！」