煲呔時常叫人要Thinkoutofthebox，但政府部門又好、公營團體又好、甚至乎各級議會都仍然十分之保守官僚。有老友日前同進士呻喺香港想推廣體育活動真係困難重重，個古仔係咁嘅：
話說老友係wakeboard發燒友，本身亦係持牌教練，一向出沒於西沙附近嘅海灣，透過進士嘅介紹認識咗沙田區議會嘅wargame議員丁士元。丁仔今年就撈咗個沙田民政事務處轄下嘅青少年暑期活動委員會主席做。兩條友傾傾吓就講起以往由政府安排嘅暑期活動真係mooncake到爆，丁仔今年已經加咗wargame落去，老友聽到亦好想將wakeboard推廣畀更多青少年，就問丁仔有冇興趣，丁仔亦好老實，話個會得shoestringbudget搞唔到。老友二話不說就話拍心口搞掂。
民政處唔識搞活動
之後，呢位老友就自己「科水」請咗間專搞event嘅PRfirm去跟進，做咗個proposal交畀個會，內容好簡單，就係老友會搵商業贊助、必要時包底所有支出，免費招收區內年輕人參加訓練班。
去到個會度，真過癮，原來大部份委員都係阿嬸同阿叔，就係佢哋負責審批各項活動，佢哋問嘅問題值得同大家分享下。有人問玩wakeboard個海喺大埔嗰邊，同沙田區冇乜關係，點解要搞？又有人問PRfirm係咪借委員會「過橋」去賺錢？又有人問保險點算？PRfirm都好叻，解釋畀班阿叔阿嬸聽沙田本身冇海，但沙田嘅青少年都有權玩水上活動㗎！
至於賺錢問題，由宣傳費用、教練費、租船費以至第三保費用同PRfirm費用，老友都已經拍心口搵贊助包底，委員會一毫子唔使出都仲驚俾人呃！至於保險問題，係人都知同政府合辦活動，保險由政府承擔，PRfirm亦攞咗法律意見。可憐呢班阿叔阿嬸同民政處班官員，居然連呢樣嘢都唔知！
搞完一大輪，最後嘅結果係班阿叔阿嬸認為欺山莫欺水，太危險嘞，唔do。老友經此一役，都覺得同政府打交道當真大開眼界。各位沙田區嘅青少年朋友，你哋暑假嘅時候都係留番喺屋企上吓網打吓機好啦，起碼唔怕跌親或者浸親。真係想玩水嘅，玩洗手盆好啦，千祈咪玩浴缸，因為都太危險啦！
傳真︰2623-9278
電郵︰[email protected]