任賢齊噚日一早嚟咗香港，原來佢準備做噚晚開演嘅劉家昌演唱會表演嘉賓。噚日十二點前，小齊一身型仔黑色皮褸，笑容滿面咁出閘，記者問佢嚟香港做乜，小齊好鬼馬咁話：「好多嘢喎！」跟住先肯正正經經、用唔鹹唔淡嘅廣東話話：「我啱啱喺上海拍完西裝廣告，今晚做劉家昌演唱會，聽日就返台灣，要為六月喺美國嘅演唱會綵排囉。」