港股噚日大跌，早係意料中事，但上晝升過一陣，到下晝先大插，又幾夠戲劇性。恒指見過15605，係今次跌市新低，收15645，跌212點。中行（3988）掛牌，成交61.3億股，總值200億元，令噚日成交大升至540億元，係4月28日以來嘅高紀錄。
中行在人人冇乜期望之時上市，竟然以3.40元高收，令一眾股民，包括以「孖展」認購嘅，全部有錢賺，皆大歡喜。大戶同基金擺明食貨，由自動兌盤3.15元開始，就個個位係咁接，係咁掃，睇個勢，佢哋仲未夠喉；股價呢？應該仲有得上。
濠賭股呢輪又有番熱氣，銀河娛樂（027）傳有大財團高價入股，噚日早段最高搶到8.75元，午後大市個勢轉弱，佢仲可以收8.30元，升0.15元。另外，新濠（200）配股集資12億元，股價亦不跌反升，收21元，升0.70元，比配售價19.10元高成10%，成交8600多萬股，唔計配售嘅6300多萬股，有成2300萬股轉手，街外貨源已愈「索」愈亁。
短線可見1.05元
大價濠賭股有人垂青，細價嘅亦唔會寂寞，講到短中期回報，可能細價嘅會更可觀。好似黃金集團（1031），股價噚日雖然跌咗兩個位，但聽聞已有大行同基金睇中，好快會有動作。另外隻澳門實德（487），在珠澳連體發展嘅綜合項目上會好受惠，事關實德在十六浦嘅發展同澳博合作，而澳博在珠澳大計會擔當重要角色。
早輪寫九洲發展（908）時，提過澳門十六浦同珠海的灣仔會共同發展龐大的娛樂設施項目，珠海方面由九洲擔大旗，而澳門方面，實德有機會參與其盛。
九洲股價近期已升咗唔少，而股權亦有大變動，幕後人已開始做工夫；至於實德，除咗假前股價升咗幾個仙外，未算大郁過，4月中股價曾見過1.22元高位，家吓仲低成26%。實德股價近日由0.75元的低位反彈，在0.90元水平形成旗形整固，若破位而上，短線可見1.05元。
實德十六浦項目已獲批增加地積比率，可建樓面面積增近1倍，至12.65萬方米，投資共24億元，其中賭場佔2.7萬方米、酒店4.9萬方米，以及商場5萬方米，珠澳合作發展，十六浦將會大旺，對實德好有利。
郭兆誠