浸大傳理學院噚日搞咗個「香港公營廣播管治、財政同問責」研討會，吉叔黃應士班齊馬出席，聽咗一大輪，得出結論係冇一個模式可以畀香港照搬，但外國成功經驗可以借鏡，好似BBC同台灣公視嘅運作，都各有不同，而最緊要梗係要有錢、有自主權同有收視啦。
港台風波不斷，朱培慶處長（圖）人都瘦晒，佢自己話唔覺，可能係剪咗頭髮嘅影響喎！外間早前傳朱兄唔撈，卿姐都好感興趣，仲問佢幾時劈炮㖭！
其實唔撈嘅唔係朱兄，而係佢嘅副手夠鐘，兩位助理處長戴健文同張文新都有機上位，吉叔見到戴健文，就話要恭喜佢，仲笑笑口話：八卦雜誌話係就係㗎啦。而張文新就同卿姐呻，話港台有太多老闆，吉叔之外，立法會又話要整報告，驚住出現嘉亨灣翻版，到時真係唔知聽邊支笛好。
另外，中大亞太研究所喺本月16至22日訪問咗1002位市民，調查顯示，超過九成被訪者話經常或有時收聽及收看港台節目，63.8%受訪者滿意港台表現，47.1%受訪者贊成港台以公營機構的形式獨立運作，仲建議由社會團體提名非官方委員會管理，朱處長聽到應該開心番啦。
傳真︰2623-9278
電郵︰[email protected]