本欄最後一篇訪問，對象是筆者的「童年偶像」黃偉文。想當年，筆者上堂發白日夢，最愛於教科書上筆錄歌詞，他的心血結晶，跟我的口水鼻涕長埋書內，濃稠得化不開。沒想到多年後通宵達旦，伴着呵欠淚水，對象仍然是他。訪問前迷信Wyman說過的「不值得為一碗雲吞失去一位偶像」，筆者也怕「為一份稿失去一位偶像」。不過，整個過程中，以為高傲不買賬的Wyman，竟比手心冒汗面對偶像的筆者更驚青怕死，怕我筆下的他太自負、怕遭人閒言閒語、怕講負面事、怕電話響、怕俾人追稿……還怕死，真的入棺材那種。
記者：陳慧茵
攝影：黃子偉
場地：LOLL
怕《蘋果》 十問九唔答
黃偉文，生於伊利沙伯醫院，於佐敦已拆卸的「花地瑪幼稚園」畢業……語未畢，成長的心路歷程，當事人已建議你參考他的三本著作加過千首歌詞，「還有甚麼值得講？」
唔掂！掏空心思再從頭問起：「讀幼稚園時係咪已經好突出？」「咪又係普通細路一個。」「家境呢？」「一般，記得家境好嘅同學會畀定錢學校嬸嬸，下午茶就有汽水飲，我羨慕，不過係細路都恨飲汽水，唔係你哋諗有童年陰影嗰種。」
橫死掂死索性錐入敏感話題：「有人話林夕的詞每下愈況……」「呢個問題點答都有事，講都唔講最好。仲有，千祈唔好問我邊一首歌最代表到我，每次訪問都俾人問，我從來唔會答亦唔希望有人再問……我認我好謹慎無趣。」
其實由約訪問開始，Wyman已明示暗示怕《蘋果》愛抹黑，只是沒想過見了面那重自我保護意識仍這麼強烈。
怕濫 手提10年未開過
你怕時我更怕，這篇訪問點收科？惟有不停自我安慰「Wyman講乜都擲地有聲」！事關成功約他做訪問，真的不容易。話說訪問前先致電留言，2日內一直沒有回覆，猛然省起某同事提過「先Call後SMS」的「搵Wyman秘技」，果然SMS後不出2小時便得到回覆。「我唔鍾意喺無預備之下接電話。尤其一打嚟就問啲唔關我事嘅是是非非，我連答嗰句都唔想俾人Quote到。」是以他的電話長期飛Call台，「10幾年嚟我從來無開過手提，我只會打出，其實我應該用天地線。」到聯絡上Wyman，3天後再致電落實時間地點時，他又突然告訴我：「其實我都想打畀你，唉，我將我心入面嗰句都講埋畀你聽喇，我其實唔係好想做今次訪問，𠵱家又唔係宣傳期，我好衰咁諗不如留番個Quota遲啲先做。」……「咁，我都將我心入面嗰句講畀你聽，其實呢個版面有今生未必有來世，而且……我哋預咗星期五的版面畀你。」筆者差在沒有把「我怕甩稿」的潛台詞講出口。於是，兩個PR技巧拙劣的人咿咿哦哦了5分鐘，最後他大抵感受到筆者的「誠意」，才撮合這篇訪問與被訪都誠惶誠恐的報道。
怕追稿 減產50%
怕煩怕濫怕炒作外，更怕電話鈴聲引致不安，使Wyman常疑神疑鬼是催交歌詞。熟他的人都知，他有鋪不到死期不交稿的習慣。而逢星期一、二便是最忙的日子，《蘋果》、《Milk》等專欄死期都堆在這兩天：「通常靈感喺腦內醞釀，截稿前才會開始寫。最嚴重時幾乎每日有死線！以前驚得罪人就盡接，結果：一、係依時交唔好嘅嘢，二、「翳」人畀多1、2日時間。」聲言忍受不到交核突嘢的唯美主義者，擺明揀第二條路，但漸覺老土生厭：「好似去街市講價叫人減收1、2蚊咁，既然食唔晒咪唔好嗌咁多囉。」「唔嗌咁多」具體點說就是由每年100首歌詞減產至50首。連電影客串亦「無接好耐。嚟嚟去去演1-3號表情，發揮唔到我小宇宙。」
怕瞓 另類早睡早起
Wyman的小宇宙，在入夜後才發揮。「由細到大都覺得瞓覺浪費時間，畀我瞓4個鐘已經夠飽。」打從童年開始便已養成每晚11點鐘晚餐的習慣，令他變成不折不扣的夜鬼，「我個人好心散，寫嘢一定要喺絕對寧靜嘅環境。」有幾年時間，Wyman習慣中午以後才上床睡，近年「早瞓咗」，早上7、8點上床，「我諗一年之內，天未光就瞓嘅次數少於20次。」偏愛夜闌人靜還因為「全世界瞓晒唔使怕電話響！」
以前好恨曝光，大個咗就明白要用自己經驗品味去評價咩為之有用嘅曝光。
無有怕之一 爆郭啟華開綠燈
原來由一開始，「夜瞓」便是他工作的幸運密碼。Wyman參加91年商台主辦的超級樂迷競賽電話遊戲，自認本地音樂精的他排眾而出後，電台職員晨早致電，「請」Y少清早到電台領獎，「我同佢講朝早要瞓覺未起身喎。」於是時間改為晏晝2點。「無得再晏㗎啦，你嚟到就嚟啦。」於是一千零一日，2點鐘，俾佢撞到鄭丹瑞獲垂青才有幸成為DJ。
以上這段入行經歷，其實都提過好多亦好多人知，貫徹是次怕講太多的訪問精神。正暗歎無運行之際，卻來個反高潮。「其實參賽前我已經入咗進念識咗當時喺商台做嘅郭啟華，當時參賽者無乜邊個特別標青，同分又要進行第二輪比賽，好煩，郭啟華知我熟本地音樂，於是話：『如果你玩實得！不過你打電話入去一定唔通，咁啦，比賽前我直接打畀你。』」此段郭啟華主動致電參賽者的秘聞鮮為人知，Wyman你唔怕咩？「今時今日講出嚟都唔怕嘅，不過我強調佢無提過我水㗎。」
無有怕之二 俞琤出天價回巢
爆開有條癮，入商台傳奇，離開商台亦有段古。「當時連續1、2年Rating第一，自問對電台有交代，人生有階段，想MoveOn專心做好歌詞。」「既然想『專心』，何解又轉投新城懷抱？」我藉機抽抽他後腳，「舊老闆張承襄過檔新城周圍招兵買馬，佢係我恩師好錫我，自己當時放咗幾個月假其實都唔知想點，加上人工真係好高，幾多唔方便講，但起碼今日有人出番咁嘅價錢請我，我都唔係唔使諗就可以推嗰隻。」講起風光事，原本密不透風的他，終於說溜了嘴。「其實當年俞琤都想請番我，仲話：『你要幾多即管開口。』但嗰時喺商台工作唔夠開心，返工又Underpaid，心諗我要走你先識挽留我，𠵱家『我唔要呀！』於是拒絕咗，擺明係為啖氣㗎。」不怕天高地厚、寸寸哋的Wyman終於返來囉，守得住作為「童年偶像」的最後防線，亦希望保得住小記飯碗，Wyman真係講得咁多，老細麻煩收貨！
後記
在商台Underpaid為啖氣走，過檔新城也不過做了11個月。「想當年身兼電台主持與填詞兩職，幾年來最想見嘅朋友只能間中會面，然後盡力逼自己成為盡責嘅人，最終搞到抑鬱差啲黐線。」講完！「唔係滑頭唔答你辛酸史，𠵱家年紀大記性差，Ram只夠記開心事。」是以今日的Wyman，最最怕的其實是死。「以前唔開心時唔怕，𠵱家好怕。」因為今日生活富足，滿足程度是：「如果就咁過世都制。我唯一擅長係見好就收，做電台如是、寫詞如是，對其他人嚟講可能有『割禾青』意味。」老實說，我開始明白他的確有「唔答」、「唔做訪問」（甚至唔撈）的「割禾青」條件，不是滑頭，這番話筆者亦百分百衷心。
Profile
出生日期：1969年5月21日
曾主持電台節目：《娛樂性騷擾》、《係咪玩嘢？》（商台）；《997大奇蹟》（新城）
著作：《Y》、《俗》、《潮騷》
歷年代表詞作：《浮誇》、《奇洛李維斯回信》、《好心分手》、《燕尾蝶》、《歡樂今宵》、《（你沒有）好結果》
重要獎項：叱咤樂壇填詞人大獎（05年、04年）、四台聯頒最佳中文流行歌詞獎——《（你沒有）好結果》（95年）
電影：《新紮師妹》、《玉女添丁》、《愛你愛到殺死你》、《初戀無限Touch》
唱片：《黃偉文十年選AfterTen》
黃語錄
巴士阿叔事件
Wyman：香港人首次咁Creative，證明大家都等緊機會發揮，最想睇吓8月左右淡忘咗未，咁又證明到香港人另一特色。
達文西密碼VS變種特攻3
Wyman：《變》好睇啲，可能我一向鍾意超能人，第三集好難拍，但導演處理得好；達文西篇幅所限被迫Cut走好多趣味Details，成本書唯一好笑位──Rolex嗰部份Keep番，幾滿意導演的Taste。
Blog
呢個世界只有睇Blog同寫Blog兩類人，通常喺街拎住部手機影相嘅就係後者，我就屬於前者，1星期3份稿已經夠多喇，仲寫？至於ICQ、MSN我從來唔玩，我唔鍾意自己咁Available。