中行（3988）首日掛牌逆市上升15%至3.40元，令到大戶大豐收，近95萬個香港小股民賺粒糖，孖展客唔使蝕入肉，算是皆大歡喜。
不過，亞洲金市表現疲弱，商品價格又再調整，嚇親投資者，搞到港股午後跌幅擴大，唔見咗212點，收報15645，成交達540.37億元。
港股成交大增，經紀行的業務自然水漲船高，據證監會的調查顯示，證券經紀業今年首季的淨盈利達38億元，較去年第四季上升兩倍。但唔知係咪受到鴻運事件影響，經紀行股份表現唔算突出，極具北水南調概念的大福（665）噚日跌3.6%至1.33元，第一上海（227）跌2.94%至0.66元，申銀萬國（218）跌3.48%至0.83元，手多多走去投資銅礦的南華證券（619）更大跌10%至0.08元。
冠君持續尋底
冠君（2778）打破逢新股必升的神話後，股價一直潛水，唔耐煩的投資者陸續認輸出貨止蝕，搞到冠君噚日一度跌破4元大關，創新低見3.95元，最後以4元收市，跌8.5%。該股06年度每單位派息不少於0.1694元，以4元入市持7個月計，年度化計算的股息率大約7.26%。
新濠（200）批股後逆市升3.45%至21元，主要是有指數基金追貨調整投資組合。今次新濠在批股時間上取勝，喺正加入大摩香港指數前夕停牌，配股又唔分畀指數基金，迫佢哋追貨，呢一招都算絕。不過基金換馬過後，新濠好消息盡出，強勢能否持續就好難講，睇番大摩指數新貴富士康（2038）跌3.6%至20.05元，有啓示。
阿虎