夢想白馬王子要有乜條件？靚仔、有型、細心、進取、有錢，CM廣告王子Frankie幾乎合乎晒所有要求，興趣係潛水玩賽車有型至極，IT碩士畢業，目標做傑青。擁有明星外表，諗過入娛樂圈的他，最近決定加入補習界。有明星都唔做做補習？佢話補習社同唱片公司其實好相似，而且走紅後，分分鐘月入100萬，多過好多明星！
記者：陸伊琳 攝影：何盈傑
新丁上場免費試讀
話說一日有位女性朋友Forward了一個Forum及網站給我看：「現代教育有個新的靚仔阿Sir！」一Click開，原來是熟口熟面、拍馬會、牙膏廣告的ModelFrankie，這個炙手可熱的CM王子，上月加入了現代教育，當上F4電腦與資訊科技（CIT）補習老師，嘩，咁靚仔的阿Sir，仲以為拍戲先有，𠵱家係推廣期，仲可以免費試讀（7月才正式開班），各位姊妹是不是流晒口水，想衝去上堂？對唔住，免費試讀課程只限有學生證的同學參加。
唔教大人教細路
觀察上堂情形，女學生比例未有特別多，上堂情況有板有眼。Frankie笑言：「部份的堂都會女仔多過男仔，亦有同學真是抱着睇明星、趁熱鬧的心態，上堂不集中，眼睛不停向你打量，竊竊私語
……不過目前免費試讀啫。」Frankie話其實之前都有兼職做大學電腦課程講師，同補習社不同就是教的是三、四十歲的學生，而面對中學生就要針對性教大家答卷的技巧，貼題目。
學生點睇？
「補習社運作好似唱片公司」
「你問我有冇諗過入娛樂圈？都有朋友提議過，不過我嫌冇自由，太困身，所以打消念頭，但其實補習社就好似一間唱片公司一樣！」Frankie以當中幾位補習前輩做目標，好像Ken、K.Kwok，「現在不用做宣傳都大把學生排住隊來補，因為無人可代替佢地位，我做人都是，好想係Unique，是獨一無二，成為一個傳奇人物。」條數點計？且等Frankie同你娓娓道來。
「要識Sell自已」
「要入大的補習社做，其實唔易。同補習社份約一簽就5年，我本身並無底薪，宣傳、服裝、影印等等，乜都係自己畀。」聽落令人諗起霆鋒的一紙長約，Frankie明白目前係投資期。「紅咗月入可以好豐厚！每間補習社都坐擁自己的補習天王，學生嚟補習就等於買你的唱片，所以補習老師都好講銷量同Image！」樂壇新人首先亦要讓人認識。「我哋每上一堂都會有錄影，公司會睇番，然後同我檢討。例如公司會叫我上堂用番多啲時間Sell自己，事關俾大家認識我係好重要！」
興趣型過人
有料唔怕你單挑
Frankie：「我所教的科較偏門，但我做Model走去做補習老師亦算係我的優勢及SellingPoint！」Frankie知道自已有Sell樣，但亦怕人哋話佢得個樣，曾經有學生考他刁難他，不過佢話自己做足準備，「最緊要就係你肯上我嘅堂，上一、兩堂你就會知我唔係得個殼，我係有實力，我的電腦一級榮譽碩士不是浪得虛名。」
睇中改課程大潮流
話就話補電腦較偏門，但原來Frankie計過數，「在2010年會考科目的會考課程有變，到時除咗Phy、Chem、Bio，仲可以揀電腦來考，到時電腦唔再係讀唔讀都得嘅閒科，如今補電腦可能得三幾千人，預計到時修電腦的同學會激增。況且最吸引就是要是紅起來，月入過百萬都不出奇，大有人在！」
Frankie個人網站：www.frankie-tam.com
F4電腦與資訊科技補習班查詢：www.modern.edu.hk（現代教育）