黃淑儀（左起）、岳華同謝月美噚日出席港台電視部為《獅子山下》與《鏗鏘集》舉行嘅收視祝捷會，啱啱由加拿大返港嘅黃淑儀預計留港半年，接拍新劇《肥田囍事》同《吾湯吾水》，仲會一改戲路扮尖酸刻薄嘅女強人。講開又講，原來黃淑儀同謝月美係舊同學，今次兩人夥拍岳華拍攝《獅》劇中其中一個單元《青春小鳥》，大把機會聚舊，謝月美仲話劇集內容勾起佢哋唔少青春回憶。