隨住「巴士阿叔」3個主角全部現身，城中熱爆話題應該好快就變番世界盃。咁香港人一向最怕out，同人冇話題，所以，如果閣下係都唔肯幫襯K寶，冇得睇晒64場波，仲有個辦法，就係出番部3G，睇吓即時賽果同精華片段，就可以去到邊撞到乜人都搭到嗲。咁上邊個台好？個個都得囉！幾個網絡商都好似香港人咁，一定要人有我有嘛。
至於話邊個台啲料好啲，華華唔可以響度幫佢哋賣廣告，只可以講，CSL、SUNDAY同埋3仔都各有法寶，不外乎都係關於世界盃啲新聞、賽果預測、情報……但暫時贏個馬鼻嘅應該係超人檔3仔，佢哋搵咗張達明整個「達明世界Talk」，做其強項棟篤笑。嗱，證明華華好公道，唔係逢超人啲嘢都踩㗎。
話時話，其他幾個台開波前仲會唔會出招華華唔知，但有個提議，SUNDAY不如搵林九林海峰扮李澤楷講波；華華敢講，個爆笑效果肯定仲勁過達明，唔知佢哋啲marketing有冇諗個呢？