孫公上年底應民建聯陳鑑林邀請，紆尊降貴去到牛頭角下邨探公屋擠迫戶，畀咗民建聯一次做騷機會。身兼房委會成員，兼夾觀塘都係佢地頭嘅白鴿黨肥仔明梗係冇咁容易放過孫公，照樣發出英雄帖，點知呢個老油條孫公，就笑笑口問：你乜政黨呀？反對派呀，點啃？激到肥仔明紮紮跳。
不過，孫公都唔敢唔畀面肥仔明嘅，所以星期一卒之應邀到訪秀茂坪邨，視察四間被政府迫遷嘅廟宇，順便都睇睇邨內嘅殘疾人士設施足唔足夠，現場仲有唔少坐輪椅嘅居民向孫公大吐苦水㖭。
全程陪住孫公嘅肥仔明話，嗰日孫公表現都係一貫咁樣，即係一整日都笑騎騎，乜都話考慮考慮。肥仔明希望孫公真係做啲嘢，事關好多廟宇工作人員，都好信風水龍脈呢啲嘢；要佢哋搬走都唔係容易㗎，孫公一定要諗諗辦法，等佢哋搬都搬得安樂啲喎。
傳真︰2623-9278
電郵︰[email protected]