唐英年去完十日澳紐，睇咗好多袋鼠同羊咩之後，噚晚終於回港。事實佢唔可以再唔返嚟，因為全城矚目嘅中國銀行今日掛牌，身為特區財神點都唔可以唔在場啩。
唐唐噚日見咗澳洲新南威爾斯州州長MorrisIemma，又去咗悉尼華人社區食晏，當然少不免賣吓廣告，話香港「背靠祖國、面向世界」，中國經濟點快速增長，香港點從中得到機遇……唔知澳洲啲羊聽唔聽得明。
乜嘢機遇都係假，香港最緊要有得炒。好似中國銀行咁，有一百萬人認購，分到一手股票嘅小股東有七十幾萬，呢種抽新股嘅遊戲簡直同幸運大抽獎冇分別。唐唐身為呢個遊樂場嘅最高級睇場，今日開香檳同北京班賓卡慶祝之時，記得叫佢哋介紹多啲人嚟香港上市，頂死上海同深圳，咁就唔驚被人邊緣化啦。
傳真︰2623-9278
電郵︰[email protected]