半退休嘅電盈前副主席張永霖向來鍾情高檔藝術，但原來佢對於低成本嘅廉租屋都好有興趣，好似上個月，佢以泰康人壽非執董身份，去新加坡及大馬，同公司高層開大會，都專登抽空參觀當地嘅廉租屋。
張永霖一係去美國探女，一係去歐洲睇畫展，再唔係就返大陸去拍賣會，東南亞真係好耐冇去；佢話，新加坡嘅低成本屋規劃得好好，香港嘅廉租屋都係學佢哋嘅，今次除咗實地視察，仲將自己嘅體驗，錄咗輯節目，真係一舉兩得。
踏入5月又係拍賣旺季，張永霖就話今次唔會現身囉。事關中國嘉德拍賣活動由5月中改期到6月頭，同佢一早安排好嘅私人假期撞到正，諗過度過之後，都係唔想咁辛苦，所以選擇安安樂樂去歐遊。