外圍股市又大散，港股嘅反彈又要拖遲，今次唔排除再試上次低位15627支持，若跌穿，即係第一浪跌市未完，有機會下試15500至15200，總之，大跌之後，反彈肯定會出現。
過去半個月，看好3隻國企，分別係電力設備股哈爾濱動力（1133）同東方電機（1072），以及鋼鐵股的鞍鋼（347）。哈動同東機真係強勢畢呈，即使市勢大跌，都能夠逆流而上，而且都有可觀進賬；至於鞍鋼，亦能守穩，冇影響。
哈動期內曾經跌到落6.60元，但跟住幾日大反彈，假前仲創出新高的8.65元（除息計），收8.50元，升0.35元，里昂報告嘅目標價係10.25元，仲可以繼續以上移止賺位持有。
東機收14.70元，升0.35元，比推介時的12.85元，已升近2元，但同4月高價19元相比，仍然低出好多，此股跌過龍，家吓只係追番上合理水平，大摩估計06年（12月年結）及07年每股盈利分別為1.59元及1.72元，預測PE9.2倍，上升動力應比哈動更強。東機走勢已形成小型頭肩底，假前升破頸線阻力，暫受制50日線（14.86元），若破位而上，則短期升勢確認，上升目標指向17元。
擴產能盈利將大升
鋼鐵產品價格升勢持續，鞍鋼係好嘢，唔使多講，馬鋼（323）亦係受惠者，假前收2.75元，微跌1個位，但成交大增至2670多萬股，比周一多1.6倍，調整似已完成，只要升破10日同20日線（同在2.81元水平），短期升勢會再展開，目標係4月高位的3.20元。
馬鋼剛宣布發行5年期可換A股債券，集資不超過55億元人民幣，用於明年6月底投產的500萬噸冷熱軋薄板項目。馬鋼目前正積極擴大產能，預期07年開始，盈利將會大升。
馬鋼05年（12月年結）獲利29.1億元人民幣，倒退19%；今年第1季獲利3.01億元人民幣，同比再減少71.4%，但由於受惠產品價回升，第2季開始盈利可大幅回升。兩家大行，包括瑞銀同高盛，都看好馬鋼前景，瑞銀將馬鋼評級由「減持」上調至「買入」，目標價3.80元；高盛維持馬鋼「跑贏大市」評級，目標價為4.25元，有54%的上升空間。
郭兆誠