雖然只得一日假咁大把，但小初都忍唔住要上珠海打場波順便揼埋骨，皆因炒股好傷神，放日假唞下都好應該，反正今日全城焦點，肯定放晒落中國銀行（3988）。
中行上市咁大件事，小初當然都冇走雞，但抽得雞碎咁多，升又唔慌賺得多，跌時反而會諗吓買多啲，所以今日都係諗住坐定定，睇班外資大戶點玩好過。
除咗講起中行呢隻超級巨型IPO外，昨日一齊打波的經紀黃，問小初有冇留意身處的珠海有間窗口公司叫做九洲發展（908）？佢話隻股近期成交量大增，而且走勢強勁，證券界傳隻股會有資產重組或者注資行動都未定。
最值得留意嘅係，隻股上周五出現一宗60幾球的大手成交，每股造0.75元，較九洲上周五收市價0.89元，有折讓15.7％。九洲發出通告，話有多名董事減持。雖然減持並非好消息，但經紀黃話其實兩睇，反而留意係咩人接咗批貨先至最重要。
慕容小初