早前與Winnie出外工作，有幸坐她的巨無霸Prado，發覺1個女仔開部咁Man的越野車是件十分有趣的事，最難得是她開得掂，而且頭頭是道。坐了半小時車，我終於發覺Winnie開Prado有一個很奇怪的動作，就是經常把左手放在波棍上，而且經常按下波棍上的OD（OverDrive）按鈕。為何她經常按OD掣？她說部車會好收一點。阿Winnie姐，你知唔知OD掣有咩用？你部Prado有4前速，如開啟OD，即代表波箱會用盡4個波檔，而第4個波即是超比波，主要是用作高速巡航使用，作用是慳油，你當日以20-30km/h在紅隧塞車，部車只會行1、2波，根本連3波都未到，成日開關個OD來幹嗎？真係睇到我火滾。
Winnie你唔信可以搵一次試試在80km/h左右的速度行至4波，然後關掉OD，部車便會即時以高轉行3波，令部車有減速及加大扭力的作用，日常使用其實可以長時間開啟，除非有一些情況是波箱自行跳上4波，而又令部車無力，咁就係關掉OD的時機了。此外，有一些車是沒有OD的，只有一個Sport掣，作用與OD不同，開啟後波箱會在更高的轉數才會自動升一個波，從而榨取更大的高轉出力。送你一句：「OD並唔係咁用㗎。」
記者：袁國基