大陸流傳的一句話係：想知道自己嘅官位有幾低，去北京；仲有一句係：想知道自己有幾窮，去深圳。
不過𠵱家想知自己有幾窮其實唔使去深圳，好似香港人咁試吓走去買樓（大陸叫房子）就知自己有幾窮。所以呢句嘢應改為：想知自己有幾窮，去買樓。根本大陸房地產係咁升，平均月入千幾蚊人民幣嘅升斗市民又點供呢？再唔解決遲早暴動都似。
所以內地政府喺星期一推出地產15條宏調細則，當然本意係想控制樓價。咁即係要用行政手段控制市場。點知15條推出之後，各大城市嘅樓價唔單止冇跌到，仲係咁升。點解不跌反升呢？其中一啲原因係土地供應同開發建設面積限制，會令到市中心範圍內嘅大戶型房產（即係我哋嘅「豪宅」）變咗奇貨可居，高檔樓盤嘅價格咪升囉；仲有就係新調控管制自己人唔管外資參與嘅房地產，咁佢哋揸嘅貨又點會唔升？
我唔係經濟專家，但係好似大部份香港人咁要差唔多成世人俾層樓壓住，呢一種感覺一定唔講得上係快樂。
我頭腦簡單，所以睇嘢都好簡單。我哋唔快樂（單講樓價）係政府政策五時花六時變，仲有就係地產寡頭。
舉個例講，廣州今年推出850幾萬平方米嘅土地供應，但係都比唔上廣州排名前五位嘅地產寡頭任何一家嘅土地儲備。
𠵱家中國係官商共治（「勾結」已經係低層次），面對咁嘅局面大陸人比香港人更有創意。深圳有個鄒韜喺網絡上發起咗「不買房行動」，講嘅就係「三年唔買樓」。點知呢單嘢波及全國，佢喺5月11日仲去埋北京想交信畀總理，跟住俾深圳公安扣留咗10個鐘。佢𠵱家已經「內控」咗，自己開間公司都冇得再開門。佢呢種行為喺大陸叫做「草根行動」。
呢把火由深圳點到去北京、天津，有好多人簽名支持，支持率近八成。
佢畀溫家寶封信標題係《請總理救救「房努」；房價真高，「房奴」真苦，房地產市場真危險》。
鄒韜（留意當年有個鄒韜奮）喺Blog度寫：「在目前這個人治的社會裏，我們絕大部份人，只能苟且地活着，像狗一樣的活着……。記得有一位學者發出了『誰叫你不幸生在了中國』的言論，我想，哀莫大於心死。社會的進步需要千千萬萬有良心有血性的公民一起來推動。我時刻告訴自己，位卑未敢忘憂國，即使心死，血仍未冷，良知尚存！」
從時序上講，冇鄒韜，又點會有15條調控。
原來中國有個唐吉訶德，𠵱家就喺羅湖橋嘅另一邊。
觀火
傳真︰2623-9278
電郵︰[email protected]