由《AOE》主力創作人炮製嘅《TitanQuest》，終於喺今個月尾同大家見面，呢隻望穿秋水勁作絕對不能忽視，事關佢刻劃驍勇善戰嘅神力戰士，同一班地獄猛獸惡戰連場。當《WoW》全球大賣，同廠嘅期待作《Diablo3》更可謂遙遙無期，冇得玩嘅情況下，呢隻新作應能滿足大家「人獸大屠殺」嘅慾望！
文：陳福榮
呢款喺上屆同今屆E3備受推崇嘅《Diablo》式暴力ARPG，屬於《AOE》生父之一BrianSullivan所開設嘅IronLore創業作，由海外大廠THQ負責發行，從構思到開發足足用咗8年！表面上以古代埃及和希臘作為主舞台，不過只要通過頭幾關就能夠開啟亞洲版面，尤其係中國式小橋樓閣甚至萬里長城開戰等，打起嚟真係超有Feel！試問過去邊有遊戲諗到喺古代中國Crossover落歐洲大力士，仲要大玩決戰妖魔猛獸咁抵死？由此可見《AOE》真係對佢影響好深。
武器盔甲任你襯
雖然開發者強調敵人有好多唔同攻擊形態，偶一不慎好容易GameOver，但風險愈大回報愈高，當然唔會待薄大家。遊戲着眼點係「發掘、戰鬥、報酬」，所以喺九死一生嘅戰鬥入面，當打倒極為難纏嘅敵人會獲得可觀回報！可能係貴價品甚至稀有武器，一改以往猶如返工咁去Camp寶嘅慣性，引你不斷去挑戰惡啃勁嘢！
遊戲另一大特點，就係有好大嘅養人自由度，令玩家好似玩緊MMORPG咁款。單論職業就有戰士、法師、流浪者甚至惡棍等逾20種，兼且變化甚廣嘅升級系統，俾玩家有無窮無盡方法去強化角色。技能設定亦有唔少方法，力量型或者魔法型任君選擇，佢嗰160種獨特魔法技能分為8大類別，不過玩家只能鎖定其中2類別、亦即最多攜帶40種技能，不過每招又有最高20個等級，即係話逐招練都有排你玩。
正邪人神鬥法
《TitanQuest》賣點係勁靚全3D畫面，保證流程節奏爽快充滿電影感，營造出詩篇般嘅正邪大戰。故事講到泰坦族係比眾神祇更「神」嘅生物，但由於喺囚禁住佢哋嘅永恒監獄逃走出嚟，誓要對付世人大搞破壞報仇，結果就要由人類戰士嚟執手尾，因此唔少敵人設計意念都係嚟自各個著名神話。據知全隻Game至少可以玩60粒鐘，雖然3個唔同Level版圖一樣，但玩嘅嘢有好大分別，亦分為單挑頭目嘅主線任務、尋幽探秘嘅旁支任務與帶同隊友圍剿敵人嘅群體戰鬥，花臣多多玩得耐都唔覺悶。
PROFILE
遊戲類型：ARPG
對應機種：PC
遊玩人數：1人
開發廠商：THQ
推出日期：6月25日
