提起英國KEF，好多人都會聯想起佢套「蛋」KHT2005.2，完美聲效加獨特「圓美」外形，自此上至日本影音大廠、下至腦場喇叭仔，都嚟炒蛋一番，不過徒具其形未得其髓。KEF終於推出旗下首部5.1DVD影院組合，並將蛋的靈魂Uni-Q技術放置其中，連來賓明哥黃耀明都聽到眯眼叫好！
記者：朱崇德
攝影：譚盈傑
靚聲嘅KEF揚聲系統配置DVD播放功能，首次即插即玩，唔使花時間左搭右配，亦好方便追求完美聲、畫的用家。雖然係套裝機，難得音效亦相當清晰悅耳，尤其用嚟聽抒情音樂，感覺好舒服；另外要一讚個5.1定位非常準確，用嚟睇戲夠晒Good！
英國老品牌KEF，一向以喇叭系統聞名，至於連DVD功能的影院組合一直不多產，舊年05先推出佢哋首部2.1DVD影院組合KIT100，由於是模擬5.1效果，雖然音效一樣咁正，但總叫Fans感覺有點不足。今次新推的KIT200是首套真正5.1DVD影院組合，由於屬鑑聽級別，所以機價亦定在$17,800高位。
逐行掃描冇鋸齒
對KIT200第一眼接觸，輕叫了一聲「Cool！」簡約圓角機身、全黑鋼琴面，配以素白顯示屏，非一般賣弄花巧的日本機，秉承High-end機簡單就是美！而且這股冷冽感覺，原來還有一半是來自全鋅合金包裹的機身！
KEF喇叭出名，影像如何？$17,800機價大家總有要求吧！DVD±R/RW、CD-R/RW、AudioCD、MP3CD對應晒（如果有埋SACD我會更開心！），色差上逐行掃描就一定走唔甩；現場雖只以二線歐洲LCDTV做測試，不過睇DVD照樣冇乜鋸齒，黑位亦見有Detail，畫面亦相當穩定吓，感覺已收貨。其他內置功能還有AM/FM收音機，而且亦有光纖、S-Video、複合視頻作接駁其他影音產品，甚至駁埋XB360作5.1輸出打機，可以話連擴音機嗰份都撈埋。
90度特強擴散角度
為了主機纖巧的考慮，擴音部份全搬進了10"Sub-Woofer內，DVD機係細咗，但Sub-Woofer就相對大咗，不過炸爆機時都見佢紋風不動，正是有辣有唔辣！
5隻衞星喇叭使用高質鑄鋁音箱，配以3路密封式揚聲器，中間的3"Uni-Q單元，特點是將釹磁鐵的高音單元鑲在低音單元軸心內，大大加強高頻訊號的反應，令聲場擴散角度可廣達90度（一般30度左右）；至於另外兩個單元，均為3"長衝程低頻單元，旨在加強音色準確度，避免失真。
同場加映
KHT3000新蛋降臨
唔經唔覺舊蛋KHT2005.2已屬2000年產品，雖曾推出改良版，但相信音響發燒友仍不滿足吧！新蛋KHT30005.1揚聲系統正式到港，一樣以Uni-Q同軸單元為骨幹，而且還加入了嶄新SST技術，能全面密封Uni-Q單元的中音與高音單元之間的空隙，杜絕因氣流造成的細微噪音；配合揚聲振膜上的RadialReinforcingRibs，在加強振膜韌度之餘，更能進一步降低失真度至0.3%至0.8%，遠低於業界2%失真度標準，好處是即使在調高音量之時，音效的純淨程度依然保持不變。
