華華之前講過，唔做總商會CEO嘅翁以登，離任後會先去西雅圖做3個星期咖啡佬，之後至正式去上海做Starbucks大中華區副總裁，話咁快已離港一個月，前兩日華華打電話畀佢，諗住問吓近況，八吓美國受訓嘅趣事。
廁所照洗冇例外
點知，佢一聽見香港傳媒搵佢，就即刻話自己離開咗香港，冇新聞價值，冇乜好講喎。好在華華面皮夠厚，最後佢都有講吓近況，但就係咁叫華華「唔好寫呀……。」其實翁生使乜咁謙，喺總商會做咗9年，商界人脈咁廣，大把人想知你嘅近況。
翁以登話，喺美國真係有洗過廁所，事關個個都係咁做，佢冇理由例外；而經佢手炮製嘅咖啡，都出得大場面，唔失禮㗎！其實佢只係落店做一個禮拜，但間舖好鬼忙，日日8粒鐘，做到冇停手，好彩佢體質唔差，先頂得住咋！
5月尾佢就到上海履新，翁以登話忙到乜都唔知，就連世界盃都唔知幾時開鑼，同華華傾電話之前，都仲開緊會，暫時所有嘢都仲係意料之內，6月佢會返香港走一轉，半公半私，相信到時可以鬆番口氣唞吓。