花旗國牛仔總統繼續換班工程，繼續施手術去力挽支持率日日創新低嘅政權。繼白宮幕僚長、CIA亞頭等職位之後，牛仔總統亦都取替財政部長，新人保爾森（Henry"Hank"Paulson）同當年克林頓財政部長魯賓（RobertRubin）一樣，都係投資銀行高盛（GoldmanSachs）嘅職員。
咁牛仔足球隊換球員，就會對世界經濟有乜影響？對大家荷包又點樣？要知道答案，首先要分析財政部長究竟做啲乜。基本嚟講，財政部長唯一一定要做嘅職能，就係喺美金鈔票上簽名，除咗呢個之外，就冇其他重要職能。大家可能會問：「財政部長唔係會左右經濟政策咩？」
如果大家睇牛仔總統前兩任財政部長奧尼爾（PaulO'Neill）同斯諾（JohnSnow），喺牛仔總統之下嘅職能，就知道佢哋其實係牛仔總統嘅sales，去sell佢嘅經濟政策。咁牛仔總統由上任到𠵱家，由提倡鋼鐵業要封關鎖國，政府支出冇節制，到共和黨「指定動作」減稅，經濟政策一路都係被競選需要主導。所以孫柏文絕對同意，有啲人話花旗國財政部長，係白宮裏競選活動揸fit人白宮副幕僚長羅夫（KarlRove），係花旗國公眾嘅傳聲筒。如果呢個情況唔變，邊個做財長都係一樣。
只係傳聲筒
大家可能會諗：「保爾森唔同奧尼爾、斯諾喎，保爾森係高盛猛人，奧尼爾同斯諾唔係保爾森嗰級，所以，財政部長嚟緊會唔會可以左右牛仔總統嘅經濟政策呢？」我同大家講，其實奧尼爾同斯諾都係花旗國商界猛人，不過究竟保爾森係咪真係可以左右經濟政策發展，今日隻金手指都唔可以為大家篤到答案。只可以分析，如果保爾森真係可以影響政策，咁發展會點？
睇定啲再打算
除咗絕對唔關財政部長事嘅環保政策，睇番保爾森以前作過嘅評論，新任財長最鍾意討論嘅，係關於花旗國長遠競爭力。大家即時反應可能係：「即係美金狂跌啦！」不過，孫柏文覺得冇理由咁簡單。做得高盛主席嘅人，真係冇理由咁容易被人睇穿，特別係保爾森上任之後，最棘手問題一定係花旗國正在爆煲嘅樓市，插爆美金，只會插爆債券市場。大家一定記得，87年股災，開始嘅時候係美金信心動搖問題，後來演變成債券市場波動，領導利率?升，繼而觸發全球股災。如果真係咁簡單，保爾森等如美金跌，咁就恭喜晒大家，因為好似鐵索連舟咁，呢幾年一齊升嘅世界股市，就啱啱遇到保爾森呢一陣東風。
聯儲局局長伯南克上任時，真係容易睇好多，亦都即係話容易賭好多。聯儲局局長職權範圍清晰，只要睇在任人嘅取向就可以落注。伯南克係個病態地怕通縮嘅人，即係會瘋狂將美金購買力削弱，令到美金貶值，所以大家只要買黃金、白銀就可以贏錢。今次保爾森上任，大家都係靜觀其變好啲，最好就係買番幾手恒指國企認沽證，睇定啲先至再作打算。
孫柏文