周二晚美股唔掂，禍延亞太區股市。亞太區獨係越南股市有升冇跌，且升幅達2.45%，冇用吖，對其他股市起唔到支撐作用。
美國換財長，搞到雞毛鴨血。昨晚美股如果止跌回升，港股今朝或者冇咁淒涼，否則跌二百點以上都好難避免。𠵱家上車買P輪，已失先機，不如喺低位撈C輪，博反彈。
滙控C輪4497：滙控（005）上禮拜最低133.50元（前日135.90元），有可能再試低位，到時執些少C輪短炒，小炒對象係2226，7月中夠鐘，輪價51仙，溢價1.5%，槓桿率26.6倍（有效18.7倍），引伸波幅15%。2226交投唔多，想買賣易，則揀4497。
4497喺8月尾夠鐘，輪價51仙，溢價2.3%，槓桿率26.7倍（有效15.8倍），引伸波幅15.1%。滙控有啲9月以後到期嘅C輪，溢價喺10%以上，咪搞，好易輸錢。
建行C輪2293：中行（3988）今朝鼓響鑼鳴掛牌，昨日報載暗盤價上到3.275元，好過先幾日所流傳嘅價錢。中行如果造得好好睇睇，對建行（939）都有利，昅住C輪2293，臨場執生。隻輪8月初到期，輪價32仙，溢價1.6%，槓桿率10.6倍（有效8.7倍），引伸波幅24.3%。
建行C輪如果溢價太高，就算壽命長啲，都唔值得買入。
章盛