男生是否愛處女？女生會否將第一次留給最愛？不是吧！現在甚麼年代。今次做「破處」這個題目，不是要陳腔濫調地跟大家討論甚麼非處女不愛，還是保留貞操的問題，而是始於筆者一己私慾。早前看過余華《兄弟》一書，故事提及到「處美人大賽」，從而引發我的好奇心，老實說，「處女」在我心目中從未佔有一席位，那麼在其他香港人眼中又如何？究竟處女是否真的如此特別？處女膜修復手術又代表甚麼？處女……
記者：黃若茵
攝影：何家良
始作俑者─《兄弟》
《兄弟》，名副其實就是一對兄弟的故事，大部份情節跟「破處」一題並無關係。至於「處美人大賽」則是一個有錢人搞的娛樂，邀得全國美人參賽，條件就是美人須得仍是處女之身。難度不高，因為全國的醫院都提供處女膜修復的服務，更有人因售賣一片片可自行裝置的處女膜而大賺10萬元。第一個浮現的疑問是：「處女膜真的可以修復嗎？」問過家庭醫生，指現代醫學昌明，區區一塊處女膜又有甚麼難度。究竟一塊處女膜，於男歡女愛之間起了甚麼作用？「破」那一刻真的如此重要嗎？
Profile
P：PC
C：Carol
W：William
B：Blanche
處女可做生意賺大錢
兩男兩女圍在一起論破處，各有觀點，爭相討論，不能不問的當然是大家聽到「處女」一詞的第一印象，談笑間，記者突然被反問，「聽見處女，你又諗起乜嘢吖？」記者當場呆了，現場一陣死寂，原來從來沒想過，破了生活還是一樣過。但席間Blanche所說的一句話，令我會心認同：「處女係笑人嘅一句說話，話啲女仔無人要。」平日跟朋友說笑，講起一些較年老又沒拖拍的女性，也不免以「老處女」一詞取笑之，雖然好刻薄，但除此以外，卻想不起還有哪些情況腦裏會有「處女」這個影像。處女處女，你又想到甚麼？
你一言我一語：
P：可以賣嘅！之前喺雜誌見到有啲13、14歲嘅女仔，拎個處女膜去賣。
C：唔係嘛，乜可以攞到出嚟㗎咩？
P：實只係妓女，佢哋聲稱自己仲係處女，就叫一個好高嘅價錢，用嚟做生意，賺大錢。
W：可能有啲男人真係有處女癖，所以先有人提供咁嘅服務。
C：咁都只不過係個噱頭啫。我就覺得好唔公平，點解要成日講處女，唔講處男吖！處女根本就係父權主義下嘅產物，好守舊囉！
B：我聽到人講處女，就會有被人寸嘅感覺，都係無人要先會俾人話處女㗎啫！
W：我又無乜感覺喎，咁多小朋友喺街上面，個個都係處女嚟㗎！
B：你又啱喎，好純情嘅諗法！不過講真，除咗見紅嗰吓，處女其實都無得驗證。
P：有啲女仔呀，就算係處女都未必見紅㖭，係唔係處女都係一樣做法。
C：唔見紅反而唔驚整污糟，雖然都只係少少血。
B：我破處嗰次都唔見紅，只係覺得痛，除此之外都無乜分別。
想搞處女=殺人放火
聽起來，處女似乎毫不值錢，但又為何偏偏有人拿出來賣，甚至去做修補的手術？想像你跟數十位女生交手，竟然從未遇上一個處女，少不免會有點心癢癢的滋味吧！「未試過就要試，咁同殺人放火有乜分別？好多嘢我哋都未試過㗎啦！」Carol說話不多，卻語出驚人，而這個比喻又確有道理，人生在世，總有很多事情未試過，為何偏要試處女？
七嘴八舌繼續講：
P：若果從未試過，梗係會好想試啦，無人試，又點會有得賣，點會有生意。
C：如果一個男人因為未試過而想試，呢種心理其實好變態。就好似有啲人鍾意玩SM、易服癖、甚至強姦，嗰種心態都可能係因為未試過㗎咋喎！
B：好明顯想試嘅人都只不過係心理上好奇啫，而唔會係心理上嘅需要。
W：無錯，有啲人可能要喺呢方面尋求自我肯定嘅位置，或者其他方面得唔到滿足。
P：又或者係以前嘅性經驗有創傷，令人好想試吓處女係咪真係會純真啲呢！
W：未試過處女絕對影響唔到一個男人的生理。
B：其實試過之後咪又係得個『哦！』字。
W：再講，對方係處女，你會覺得責任大好多，始終人哋畀咗第1次你，係一個信任，一個感情寄託，而唔係為咗男人未試過而試囉！
破處後更痛快
PC及William早就嘗過處女滋味，而Blanche跟Carol亦已破處，以他們親身經驗作分享，究竟破處一刻是否真有一些催情、煽慾的感覺，令致部份男生苦苦追求。無奈大家都說破的一刻只感痛楚，至於做愛的快感嘛，反而是在破處後才更感高潮，男生為了破的感覺，而要求對方做處女膜手術，不如先想清楚，何必要女生多受痛苦呢！
高談闊論愈講愈High：
B：做手術？儍㗎咩！破處又唔係真係咁好玩，如果我男友叫我做手術，我一定會問佢究竟有幾愛我。
C：為咗破處而做手術，又做得幾多次吖，男人總是得一想二，要我做手術，不如搵個第二個。
W：玩咩？叫女友做手術一定係黐線，點會有啲咁奇怪嘅要求。
P：都無咁嘅必要，做係為咗享受快感同埋係二人感情的另一個層次，唔係處女一樣可以有同樣效果。
B：何況破處一刻，只感到痛，根本無任何特別感覺。
W：其實男仔都會痛，反而破處之後嗰幾次，會做得更暢快，更有快感。
P：而且想做嗰一刻只係情感上嘅衝動，而唔會諗大家仲係唔係處，破嗰一下反而感到二人關係更親密，而唔會有乜嘢催情興奮嘅作用。
C：處只有1次，破咗就唔會再有㗎啦，第1次嘅記憶亦隨之慢慢沖淡，就連痛嘅感覺都開始忘記。
B：年紀還小的話，可能會因為好奇而想試處女，但大個咗就知道性生活同破處不能相提並論。
街坊有嘢講「處」是否矜貴？
明星失身記
應采兒
上兩個月應采兒接受Roadshow訪問時，李璨琛趁機問采兒幾多歲失身，采兒笑着說是22歲，剛好是她現時的歲數。
任港秀
曾自爆19歲時與初戀男友在荒山野嶺發生「關係」。
Victoria
其前度未婚夫在電視紀錄片中大爆當年如何奪得Victoria17歲處子之身。
Carol：以前都曾經諗過要留番處女之身畀將來嘅老公，但情到濃時就無諗呢樣嘢，亦唔會後悔。
