唔知煲呔係咪因為民望高企，諗住唔使靠班政黨都掂，所以趾高氣揚，同人傾偈成日不歡而散，搞到北京都擔心佢得罪人多，稱呼人少，咁到時走個陳四萬或者余若薇出嚟參選，求人攞票就唔容易。
好似有名你叫嘅富貴黨，成班都係公子哥兒，一向都係俾人寵慣，只要煲呔肯低聲下氣錫吓佢哋，畀足面，田少好易話為啫，但係煲呔偏偏鋪鋪都同人先嚟口角，差唔多繼而動武，明明係禮賓府「禮」緊自由黨呢個「賓」，結果搞到反晒枱面黑黑，仲話要三司十一局閉嘴，不准消息外洩。
件事發生咗成個月，八方本來都興趣不大，反正煲呔後嚟都知死，同田少互送靚紅酒講和。不過，咁啱知道當日引起煲呔同田少擦出火嘅張宇人，前幾日去咗北京出席一個私人活動，八方就追問佢有冇乘機去告煲呔一狀？
「冇見過港澳辦官員」
肥仔張話：「梗係冇，我都冇見過港澳辦啲官員，邊有得告狀？」計番上嚟，自由黨又真係好耐冇正式訪京，「人哋國家領導人好忙，安排唔到，冇法啦。」
如果冇記錯，由煲呔舊年參選特首，田少已經講咗幾次想上京一行，有一次連行程都公布埋，最後都係去唔成，中央又真係太親疏有別，搞到煲呔隻手遮天，胡溫有責。
問肥仔張5月11日嘅會晤係咪真係氣氛咁差，肥仔張梗係唔認，猛話唔覺得有乜問題，佢仲話：「自由黨一向都係有碗話碗，有碟話碟。」睇怕就係啲碗碗碟碟，雞雞鴨鴨激嬲咗七情上面嘅煲呔，以為田少為分權而來，於是碗碟齊飛。
聽講煲呔後來同田少想閂埋門傾過，而自由黨喺特首答問大會就沉默抗議，除咗半個自由黨人新界王發叔之外，其他人一條問題都冇問，真係鬥到出面。田少曾經話過支持煲呔做下屆特首，八方問自八公林健鋒最近有冇變，林健鋒話冇，佢哋好專一，繼續睇好煲呔喎。
田少叠馬出選唔輸蝕
其實八方覺得田少唔好太睇小自己，自由黨要攞一百張提名票易過借火，使乜成日仰人鼻息咁辛苦；吳光正就話心灰意冷，田少大可披甲上陣，以自由黨八百八十一個黨員嘅高班底分析，真係一啲都唔輸蝕。城中四大地產商：長實超人、恒基四叔、九倉正哥以及新地郭少都有代表喺度做黨員，認真巴閉，而且都係大老闆親信，好似趙國雄、何定豐、孫國林、歐肇基、易志明、徐耀祥以及陳啟龍（02年退黨），全部都係猛料之人。至於港龍嘅許漢忠、董事學會嘅許浩明、新創建嘅黃國堅、交易及結算公司嘅范佐浩等等都非等閒之輩，如果佢哋個個都忠於個黨，力量好大。
田少真係應該三思，唔好咁快話唔選，因為對手唔驚輸最驚就係有人出嚟選，咁就有數講啦。
傳真︰2623-9278
電郵︰[email protected]