鄭融前晚欣賞電影《再見流浪犬》首映，豈料看到中段已哭成淚人。鄭融表示多年前看湯漢斯（TomHanks）主演的《綠里奇蹟》（GreenMiles）時也失控嚎哭。她又謂早前化身動物救星，救了四隻小貓和一隻小狗。
近年香港人似乎都很愛看關於狗狗的電影，繼《導盲犬小Q》（Quill）及《極地雪犬》（EightBelow）等先後破千萬票房大關後，最近輪到泰國片《再見流浪犬》接棒。
前晚該片在銅鑼灣首映，嘉賓們可攜帶細小的愛犬一同看戲，故王秀琳、李樂詩和阮小儀均抱着小狗到場，此外鄭融、Rosemary及胡琳等也有捧場。
主席慰問
前晚眾嘉賓看完電影後才出席首映禮，只見鄭融眼睛微紅，她表示因電影太悲傷，令她與助手都忍不住狂哭，她說：「套戲一開始我就喊，講隻狗仔因為俾媽媽遺棄喺路中心，要自己搵嘢食，加埋啲配樂真係好慘，到中段我喊得仲犀利。我知自己易笑易喊，已經坐喺最後排，怕影響到人，但都忍住喊，索吓索吓咁，個頭好痛，我咪衝去後樓梯喊囉，我助手都係。」
香港保護遺棄動物協會主席見狀，即跑到後樓梯慰問鄭融，並將結局告之。鄭融說：「佢一講埋個結局，我同助手仲喊得勁啲，已經入唔番去睇戲。我以前睇湯漢斯（TomHanks）套《綠里奇蹟》（GreenMiles）喊得最厲害。」
愛心爆棚
鄭融表示自小母親就教她要珍惜生命，早前她還拯救了四隻小貓的性命，她說：「我嗰日錄音，喺大廈樓下見有個紙皮箱，裏面有四隻一個星期大嘅BB貓，看更話唔救佢哋就會俾漁農署人道毀滅，我諗住攞去愛護動物協會啦，點知佢哋又話咁細隻，都係會人道毀滅，我咪帶佢哋去睇醫生囉，跟住搵咗個同事收養佢哋。」
愛心爆棚的鄭融早前曾暫養一隻小狗，將牠養大後就送給朋友收養，她自豪地說：「我覺得自己都算有少少貢獻，救咗五條小生命。」
採訪：李珮洳 攝影：林德雄
