民主黨「真兄弟」事件搞到黨內人心惶惶，不過涉案嘅改革派人士，例如副主席陳竟明同新界東嘅范國威，以及一眾後起之秀例如任啟邦等，噚日就拋低煩惱，去咗大埔參加龍舟比賽。
雖然佢哋入唔到圍，但都好鬼開心，可能係一班真兄弟齊心做一樣嘢，都係格外醒神。陳竟明就話，最緊要都係落槳嗰吓大家要齊心喎。呢句說話，究竟係講畀邊個聽呢？會唔會係黨內領導層，希望佢哋多啲重視吓改革派聲音？
高達（李永達）嘅老婆Tree姐（陳樹英）原本都報咗名話要扒，但後尾教練發現佢根本冇練過，梗係唔畀佢落場啦，Tree姐惟有喺場邊打氣就算。問佢點解高達冇嚟？佢話老公未瞓醒喎，咁都有㗎。不過，高達自己就堅持起到身，只不過晏晝有「分唇」，先去唔到支持鼓勵一吓咋喎。
傳真︰2623-9278
電郵︰[email protected]
