今年由同事雪條輝採訪E32006，雖然一連幾日全版報道做到佢死咁滯，但佢都不忘搜括一啲會場精品回港做手信。聽佢講番今年廠商仍然縮皮，試玩碟、遊戲精品寥寥可數，出盡力都只攞到3大件精品返嚟派！
大量遊戲精品任攞
電腦男慨歎遊戲市場萎縮，直接令廠商減低派發贈品嚟慳錢，回想起早在98年，電腦男第一次採訪東京遊戲展（TGS）嘅風光情景；各廠商展館布置美輪美奐，兩層高設計隨處可見大量靚靚ShowGirl同Cosplay滿場飛，遊戲精品及試玩碟更無處不在，而且大多「出手闊綽」，大公仔、手機繩、精美膠快勞、PS主機貼紙等，機迷見到肯定流晒口水！有間KID居然仲抵死到送「鐘」㖭，電腦男百無禁忌一於少理，攞咗先算！
市場萎縮減預算
電腦男大大話話採訪過十幾次GameShow（當時1年2屆TGS），頭幾年真係要帶埋個「篋」落場掃貨！但實情係日本遊戲市場喺呢幾年急劇萎縮，迫於無奈喺GameShow度減Budget。打後每次採訪，都深切感受到廠商嘅縮皮；一叠靚靚PressKit改為宣傳單張、遊戲精品細眉細眼仲要派一陣就冇，到今時今日，有隻試玩碟已經叫萬幸！
樂觀啲睇，今年TGS係PS3同Wii最正面一次交鋒，兩者主機規格及對應遊戲均已塵埃落定，兩大陣營理應留有唔少預算做宣傳，加上唔少廠商已合併，當年百花爭艷風光可能再復見！