好姨薛家燕年前拍咗個纖體廣告，收身成績理想，後來連佢個超磅囝囝石耀庭同大女石祐珊都加入纖體行列，闔家瘦身。前晚好姨帶埋已成功減磅嘅囝囝去尖沙嘴睇《小孩不笨2》首映，只見現年19歲嘅石耀庭高咗又瘦咗，個樣仲成熟咗好多㖭！
女兒大學畢業
嗰頭囝囝瘦身成功，呢頭又輪到好姨要再減肥。噚日好姨喺奧海城做「天生一對美型王」選舉評判嗰陣，話自己驗出生膽石，又有脂肪肝，不過𠵱家未知使唔使做手術，好姨話：「我上個星期一夜晚瞓瞓吓覺，覺得心口好痛，到天光都瞓唔到，入院抽血檢驗，原來係個膽有石，個肝又有脂肪，𠵱家要等6月2號（明日）睇報告，先知要唔要做手術。」
好姨𠵱家128磅，佢話起碼要減到110磅左右先算健康喎，不過6月中佢就要帶埋個仔去美國睇大女石祐珊嘅畢業禮，𠵱家好姨全副心思都放喺大女嘅畢業上，不知幾心急，仲話：「我希望唔使做手術啦，最緊要唔好痛，痛到去背脊真係好辛苦！」
