安迪與中大新聞系校友舉行「答問大會」，娛樂性豐富到極，各新聞界猛將與安迪有校友之誼，問題尖銳之中帶有幽默感，合晒安迪何車，於是大家嘻嘻哈哈一晚，盡歡而散。安迪做新聞統籌專員呢個位，碰啱新聞界有咁多中大校友，算佢夠運。安迪話中文大學籌辦新書院，有個極好開始，已籌得二億七千萬元，係母校大喜事，希望以後再籌多啲喎。
安迪以後多啲關心教育，皆因太太有喜，十二月初為人父。安迪太太已經學習教仔女方法，第一個就問會長張：「你點樣教到個女咁叻，讀中一已經出版一本英文書？」會長張笑到合不攏嘴，一味話：「我冇教㗎，佢自己識啫！」係又好呀，為天才之父，不亦樂乎！安迪太又問左丁山：「你點樣教仔女？」左丁山諗咗一輪話：「冇乜教嘅喎，佢哋讀中小學成績一般，我叫佢哋讀書唔好考第一，到大學先至發力之嘛！」安迪太唔信：「你哋梗係有啲方法嘅！」呀，醒起一啲美國研究人員嘅理論，講出嚟大家探討吓。理論就係嬰兒○至二歲，係大腦發育期，如大腦受聲音刺激，會發展得更好，所以父母抱住○至二歲嬰兒時，不妨一味講嘢，或者播啲莫札特音樂畀佢聽（點解莫札特？又有研究話莫札特音樂令人快樂。）嬰兒出世之後，安迪因為服侍特首，長時間不在家，教導責任就落在太太身上咯，所以話，母愛特別偉大。安迪太太嘆口氣：「我哋邊度搵咁多嘢對住嬰兒講？」呢，有辦法，買本兒童童話故事，不論中文、英文，對住嬰兒係咁讀！
教導兒女各師各法啦，最緊要儲足教育經費。聽完安迪答問之後第二日，喺九龍香格里拉酒店撞到經濟學教授S，佢唉聲嘆氣話英鎊升得咁高，送兒子到英國讀寄宿學校（中六中七），費用好高，唔知是否物有所值。問真啲，嘩，S公子入歷史名校Winchester喎，威風之至，教授S買多兩勻股票都要頂硬上啦。好彩S教授只有一位S