中央加強調控內地房地產市場，雖然力度比預期溫和，但始終都是一個利淡訊號，大摩除出報告睇淡亞太區股市外，亦睇淡內地房地產股短期走勢。不過，唔少內地房地產股在周二依然上升。
阿虎日前亦講過，聽到對沖基金對內地房地產股仍不死心，但為何如此長情？原來係有迫不得已嘅原因，因為早前對沖基金勁炒內地房地產股，接咗唔少貨，近排跌市根本沽唔切，現時一褲都係。如果對沖基金現時出貨，肯定冇人幫佢哋接火棒，惟有焗住頂硬上，由於現時仍可借日圓平錢來炒股，佢哋希望可以捱到市場氣氛變好，投資者對內地房地產股轉為樂觀時，可以出貨甩身。
內地房產股周二普遍被踢高，合生創展（754）勁升12%至18.60元，富力地產（2777）升5.32%至43.55元，首創置業（2868）升8.51%至2.55元。其中合生與富力剛加入成為大摩中國指數成份股。
芬佬朋友話，其實對沖基金肯死撐內地房產股未嘗唔係好事，散戶如果唔想等運轉，可以趁機出貨，轉玩中行（3988）可能更好。不過，對沖基金玩得某類股份，通常都有一定基本因素支持，如果內地經濟持續向好，人民幣升值機會大，而對沖基金睇死互惠基金及退休基金遲早都要入市吸納呢類股份，所以唔怕持貨時間長一些。
富士康好淡鬥法
富士康（2038）周二臨加入大摩指數前獲指數基金狂吸，股價大升10.63%至20.80元，成交高達10.9億元，但同時沽空亦超過3億銀，擺明是有大戶吼準基金搶高富士康之際進行沽空，待基金換馬活動完成，買盤大減之時質低股價平倉食糊。至於呢個如意算盤能否打得響就好難講，因為富士康一向貨源歸邊，好友隨時出手大挾淡倉，將股價挾到天咁高。
阿虎