前排怒火旺盛嘅詹培忠，鬧完港交所周文耀，跟手又再帶頭踩場示威，仲大大聲話要喺「六四」帶住班小股民上街遊行。華華噚日專登打電話搵佢，諗住問吓遊行嘅進展，點知金勞詹劈頭就話：「都冇人正式搵過我，咁我點幫佢哋出頭呀？要有番三五百人先得㗎嘛！」
雖則遊行難產搞唔成，令到金勞詹有啲激氣（又或者鬆一口氣），之不過，向來對波好有研究嘅佢（佢以前幫黃家打理過寶路華球隊），一講到就快開波嘅世界盃，即刻成個醒晒，一輪嘴係咁講攞冠軍有6個要訣：球員技術、體能、戰術、臨場表現、天時地利，兼且要運氣好。
冠軍要有六要素
佢話自己比較偏好年輕球員，好似Fit到漏嘅「細哨」朗拿甸奴，英格蘭林柏特都唔錯。講到冠軍，金勞話冇刻意捧邊隊，但今年巴西熱到爆，睇怕都冇乜邊隊，可以打低呢隊班霸喇。
問佢會唔會過德國睇現場，金勞詹笑笑口講，現場得個嘈字，啲人又細粒，睇鬼到咩，真係要睇嘅話，梗係睇電視啦！之後又自爆，話有好多人搵過佢講波，不過自己鬼咁忙，冇應承之嘛。牙擦本色，果然冇變。
李華華