色相：辦公室嚟個YogaBreak

為兩餐，頸梗、膊痛、腰痠、背軟、眼矇、腳梗……講緊嘅係一眾人人以為打緊風流工的OL通病，好彩最近有瑜伽教室推出專為OL而設的辦公室30分鐘速成瑜伽運動，唔使大字形攤喺地嚇親隔籬，只要食晏時講少兩句是非昅少兩本八卦雜誌，安坐私人寶殿──辦公椅上扭兩扭，一大堆職業病都可以即時FING走。

記者：陳慧茵　攝影：林栢鈞、陳偉強

針對OL需要

瑜伽愈嚟愈普遍，捧場客中唔少係OL，不過偏偏坊間瑜伽班極少見針對佢哋嘅課程，99年成立的YogaLimbs睇準時機，設計出Yoga@YourDesk嶄新瑜伽班，創辦人WandaHewitt話：「嚟上瑜伽堂嘅女仔好多都係OL，同佢哋傾偈時得知工作令佢哋膊頭、頸位置成日會攰會痛，於是啟發我改良傳統瑜伽，設計出針對舒緩工作引起身、心健康問題嘅30分鐘Yoga@YourDesk課程。」

美加勁Hit

由於辦公室位置有限，所以教授動作主要以能夠在有限空間，例如座椅上的伸展動作為大前提，「好多OL每日佔咗30-45分鐘喺公司行嚟行去休息，我哋有CoffeeBreak、SmokeBreak，咁點解唔可以有個YogaBreak呢？希望佢哋學成後每日抽少少時間練習，唔好等問題出現先解決。」這套辦公室瑜伽在加拿大、美國等地經已相當普遍，好多僱主仲會專登教員工做，從而提升其工作能力。

招式一：大鵬展翅式

1右手伸直，左手手掌抓緊右膊，深呼吸，左右手交換重複以上動作。

2隻手交叠，手掌向上伸直，雙手合十，深呼吸，左右手前後位置交換，重複一次。

常犯錯誤：做向上伸展動作時，膊頭容易高低不一，要注意膊頭平衡。
舒緩部位：三頭肌、肩胛

■WandaHewitt擁有超過15年瑜伽練習及教授經驗。

招式二：壓腿拗腰式

1右腳足踝放於左腳大腿上，吸氣，坐直後再呼氣，雙腿交換重複以上動作。

2想伸展更全面，將雙手伸直觸碰地面，深呼吸3-5次。

常犯錯誤：小腿屈曲時注意要平放。
舒緩部位：臀肌、外旋轉肌

招式三：鬆弛腳筋式

1坐於櫈邊，左腳90度平放，腳面向上，右腳伸直。

2身體向前傾，以手指觸碰地面，深呼吸，交換腳重複動作。

常犯錯誤：伸直的腳掌好容易會不自覺向外傾，記緊腳趾尖要朝天。
舒緩部位：腿筋、後腰

YogaLimbs（25257415）
地址：上環蘇杭街69號33及34樓

Yoga@YourDesk
收費：$188/90分鐘
日期：逢星期六及日（請致電預約）

三叉趕走肌肉痛

雖然辦公室瑜伽夠自助「不求人」，不過有時收工真係懶到好想雙腳伸直──眠一眠，位於中環的BodyZEN係少數融入中醫概念的美容站，OL可針對肌肉勞損部位，度身訂做一套適合自己的療法，特別之處是以三叉形狀的器材代替傳統人手進行按摩，力度更實更準，還可一試暖笠笠的焗桑拿火療法，有專人服侍，OL肯定舒服到唔捨得走。

■長期坐姿不正確背脊膊頭就會見痛，用三叉刮時，皮膚出現紅腫即代表該部份過度勞損。

BodyZEN（27706728）
地址：中環雲咸街8號27樓
收費：經絡氣通三叉療法─60分鐘療程$780
循經解痛行血火療─背部護理$480

■腰背痠痛不妨試試火療，溫通經絡之餘，點火過程亦能令低層按摩膏加速滲透。

Ruby：對得多電腦，膊頭好易痠軟，喺辦公室都可以做瑜伽真係好方便。