哈！呢期MPV市場真係好熱鬧喎，先有新版豐田Previa跟萬事得Mazda8登場，點知連日產Presage都喺日前推出Facelifted新版，睇嚟我嗰個成日話要買部MPV代步嘅老友，今勻真係有排揀啦！
新Look型得多
剛啱喺呢個星期初推出嘅Facelifted版日產Presage，最容易看出有改變嘅地方，我會首選車頭部份。原因好簡單，因為新車嘅鬼面罩跟頭燈連成一體，加埋同屬新設計嘅頭泵把連霧燈及17吋跑車合金輪圈組合，令部車望落去不但靚仔咗，最重要係潮咗吖嘛！引擎配搭方面，更屬於頂級VQ系列引擎，跟以往的相同，分別是2.5公升（163匹）及3.5公升（231匹）型號，其中後者不論輸出跟耗油表現，也比其他同級對手來得優勝。
座椅鋪排任你變
跟舊有的Presage一樣，車廂3排座椅可供乘客有妥貼舒適的乘坐感外，也有靈活多變嘅效果，若有需要的話，可以將尾排收摺起擺放大型行李，又或是將座椅放平形成卧鋪；設備方面都好齊全，例如有桃木裝飾，還有置於經過重新設計的中控台上嘅恒溫冷氣及高級音響等等，用起上嚟仲好方便㖭！
記者：鄭達基
