煲呔真係好命水，上任以來都冇乜真正遇過棘手嘅事，所以民望持續向好。大家見到冇乜報紙對佢進行批判性提點，就知新聞界幾錫佢啦！原來北大人都留意到呢個現象，最近好多北京探子嚟到香港，都係問呢一條問題：點解煲呔咁受歡迎？點解佢嘅負面新聞咁少？睇怕北大人都好想知道煲呔究竟有乜把炮隻手遮天，連無冕皇帝都搞掂。
特區報紙咁少鬧煲呔，梗係同佢老哥權術高明有關啦。佢一上位，就周圍拜土地，冧掂晒各大傳媒老闆，於是啲新聞界同業先進都好識做，咪手下留情囉。其次，香港傳媒有傾向同中央看齊，愈嚟愈鍾意報喜不報憂，就算知道佢有乜衰嘢，都輕輕帶過就算，費事破壞𠵱家嘅和諧氣氛，冇晒獨家消息啩。
政治化妝師 唔使出手幫拖
當然，煲呔自己都好努力，加埋身邊啲spindoctor（即係所謂嘅「政治化妝師」）日日做嘢，軟硬兼施。即如煲呔位新聞統籌專員Andy（何安達）就講過，市民見得特首愈多，愈會接受佢，結果煲呔好聽話，以前老董唔肯做嘅馬騮戲，煲呔就做到加零一，差唔多每星期都巡區一次，叫佢瞓身同細路仔玩佢都肯制。好似上星期六，佢又靜靜雞走咗去大埔行行逛逛，同市民近距離接觸。
呢家嘢，以前嘅老董點肯做？但家陣煲呔係自動波去馬㗎，搞到啲政治化妝師幾乎唔使攞起眉筆粉盒，老闆都已經自己搞掂；有個咁嘅老闆，啲細嘅又真係幾好做噃。
煲呔除咗大量做騷，手起刀落都係佢得分另一原因。好似鴻運證券上星期突然爆煲，只要啲散戶齊齊向政府聲討血汗錢，都可以係好大單嘢㗎，但煲呔就好緊張，前日晨早就責成馬時亨局長要搞得好好睇睇，大有你唔掂嘅話我就親自披甲上陣咁款，嚇到啲局長死。吓吓要煲呔御駕親征又點好意思呢？所以肥馬即時拍心口，結果情況噚日已經受到控制。呢一鋪如果大團圓，可能令馬仔減低07年被叮出局嘅危機㖭。
再講遠啲，梁展文（CM）單嘢都好杰，激到煲呔眼坦坦，好在肥龍運用英國人嗰套功夫，一味死拖，即時成立獨立委員會，壓住啲不滿聲音，最後CM冇受罰，仲撤回司法覆核，煲呔又成功拆咗一個炸彈。呢啲功力同權術，真係唔係人人做得到，老董就肯定望門興歎。
既然身經百戰，又點會怕人攔途請願？今日煲呔去屯門睇龍舟，白鴿黨主席高達（李永達）之妻阿Tre2