新聞統籌專員安迪藝高人膽大，出席中文大學新聞傳播學院校友會晚宴作演講嘉賓，安迪都係中文大學畢業嘅，不過讀嘅係英文系，畢業後成為《虎報》記者，《南華早報》政治編輯，公關顧問，估唔到今日會咁巴閉。
中大新聞系校友在報章雜誌、電台、電視內，可說高手如雲，是晚幾乎空群而出，安迪如走入獅子籠，不過佢已練就一身鐵布衫神功，刀槍不入，任班資深編輯、記者點樣出招，都冇法子咬到入肉。安迪話：「今晚大家要交二百蚊餐費，如果覺得唔滿意，請向校友會要求回水！」其實大家滿意到極，會長張幾乎想臨時向每人增收五百大元，作為校友會基金㖭。聽完安迪演講，下次搵嘉賓，難免有珠玉在前之歎。
安迪太太就一味笑，望住安迪，眼神無限溫馨，有人問：「點解某報今朝已經報道你會十二月做老竇，係唔係你爆料？」安迪笑到㗎㗎聲咁答：「親疏有別喎！」眾人為之嘩然。總編輯B話：「咁樣講，安迪有壓力，我哋有壓力，事情未解決，未解決！」呢句巴士阿叔名言，已傳誦一時，廣為應用，好似安迪咁，當日早上四時半起牀返工，為的就是與民主黨傾掂添馬艦政府總部項目。呢件事，曾特首有壓力，民主黨有壓力，事情可望解決，安迪可望稍減壓力。
「親疏有別」一詞，非常中國式，唔識中國文化，睇唔明。識得中國人思想，「親疏有別」就理所當然，問題係選擇何人為親，何人為疏而已。有人問安迪：「親疏有別是否你為特首諗出嚟？」安迪答：「特首唔相信之事，冇人可以逼到佢宣諸於口，我絕非『親疏有別』原創者。」
「親疏有別」嘅英文翻譯應該係乜？冇人記得問安迪呢位英文系畢業生。左傳有「疏不間親」一詞，已故陳佐舜博士譯之為“Distantrelativesshouldnotcomebetweennearones”（見中國諺語選集第147頁，陳佐舜編譯，中文大學崇基學院一九七三年出版，此書相信已絕版，左丁山藏本係陳博士喺二○○一年五月賜贈嘅。）有此線索，大家可以諗吓點樣翻譯「親疏有別」，點解要譯呢？因為英文報紙編輯睇見「親疏有別」四個字，即刻嗌Help！