相信大家都知道，仲有10日，世界盃就開波。世界盃向來係投注額最高嘅單一體育項目。5、6月個股市都係大家話齋，五窮六絕，所以今日，孫柏文繼貼買白銀同中石油之後，第3次用隻金手指幫大家篤一個投資項目出嚟。
今日，我係想叫大家一注獨贏買花旗國足球隊，不過千祈唔好睇錯，唔係叫你買花旗國贏世界盃，雖然我係一個不折不扣嘅自大狂，不過我冇咁癲！今日，我只係想叫大家買花旗國家隊贏小組冠軍。花旗國喺E小組出賽，同組有歐洲強隊意大利、捷克共和國同非洲代表加納。純粹睇牌面，花旗國真係凍過水，唔好話贏小組冠軍，就連做小組亞軍出線十六強，都好難。
家吓到咗收成期
不過，花旗國足球真係今時唔同往日，因為經過94年花旗國舉辦世界盃之後，花旗國開始出現草根層面嘅足球活動。當年就吸引了一群8至12歲嘅男仔參與，到06年，花旗國足球就到收成期（足球一向以嚟喺花旗國得女仔踢，甚至乎，足球喺花旗國可以稱得上為女性運動）。
技術上，花旗國足球員一定不遜與歐洲同南美洲足球，我唔記得邊個偉人曾經喺冷戰時代被人問過：「花旗國教育制度崩潰，俄羅斯蘇維埃技術步步緊迫，驚唔驚花旗國再唔會有技術人才？」
呢個偉人就答：「千祈唔好擔心花旗國人民蠢，如果你要知道花旗國人民有幾叻，只要打開收音機，聽下任何體育節目，你就知道如果花旗國人民熱愛一樣嘢嘅時候，就會瘋狂地研究。就連打電話入去嘅觀眾，對於戰術、球員調配、工資控制等等都係專家。」只不過以前，花旗國人民唔熱愛足球，所以先至冇乜成績。
心理上，作為一個冇乜成績嘅國家足球隊，面對傳統成績彪炳嘅國家足球隊，一定會有壓力。千祈唔好低估呢種壓力，我記得有人同我講過，巴西國家隊黃、藍色嘅球衣配搭，就係會畀對方球隊好大壓力。喺02年世界盃，英格蘭領隊艾力遜，特登要求巴西隊着唔係黃、藍色嘅球衣，希望減低英格蘭球員嘅壓力，不過後尾英格蘭都照樣敗北。心理上，以前嘅花旗國國家足球隊，都好似其他足球小國一樣，未上場已經輸心理。不過轉捩點就係98年世界盃，我記得當年花旗國大戰德國，花旗國輸咗，但係花旗國班球員就覺得輸得唔抵，因為雖然輸咗，佢哋覺得對德國隊級數嘅強隊唔係冇得打。
睇埋對手贏面大
大家一定會問：「孫柏文點知花旗國班球員諗乜先？」其實，我都係睇02年世界盃一段訪問先至知，我記得段訪問就喺八強淘汰階段，臨開花旗國對德國嗰場波之前播。我自己睇完段訪問，我都覺得花旗國冇得打，一定會俾德國隊教訓。點知，雖然花旗國都係輸一比零，不過佢哋力壓90分鐘，最後連德國領隊都覺得，一比零嘅戰果都係因為有行運女神嘅眷顧先至有。
最後睇對手，非洲代表冇經驗，捷克共和國不成大器，意大利總體國家足運欠佳，除非委派祖雲達斯領隊去「搞掂賽果」，否則應該冇運行。所以，大家一注獨贏買花旗國隊！
建議買入：花旗國家隊贏小組冠軍
目標價：馬會提供6.5倍
年期：打完小組階段可以收錢
孫柏文