下晝3點半，恒指好哋哋，只係唔見10點左右，期指忽然向下，港股全日埋單跌咗105點。期指更跌150點，又由高水轉回低水26點。
中移動（941）、中海油（883）同埋聯通（762），3隻重磅股個名都有「中國」行先，總共拖低恒指61點，包咗恒指跌幅6成。
上升股隻（不計認股證）同下跌股隻數目大致相同，唔使驚青。個市再跌啲，就係入市買C輪博反彈時機。
中芯C輪9677：中芯（981）忽然有勢，收1.15元，升6仙，成交金額1.38億元，全市排名第33，比前日多咗3倍。呢家蝕本半導體公司，都唔知傷咗幾多小股民嘅感情，26個月前以2.69元招股，到𠵱家唔見嗰橛大過剩番嗰橛。
中芯C輪9677，大成交，有289球易手，收6.3仙，升34%，龍虎榜上排第3。隻輪11月初夠鐘，溢價8.1%，槓桿率18.3倍（有效9.1倍），引伸波幅22.5%。
中芯C輪，最靚係呢隻。但正股好難睇好，賭9677同到澳門買大細冇乜分別。
中銀C輪9321：中銀（2388）低見14.80元後，收番15元，冇升跌。但隻C輪9321則收6仙，大升40%，重叻過上便中芯C輪9677。
隻輪仲有兩個月命仔，溢價12.9%，槓桿率250倍（有效25.6倍），引伸波幅19.5%。咁嘅數據，博唔過。昨日打入龍虎榜第2位，夾硬嚟。
唔使羨慕有貨在手者，如果喺3個幾星期高價揸咗9321，到𠵱家已經蟹咗8成，慘情。
章盛