端午節假期前，小初諗住大市一定靜，但實際上又唔係，濠賭股動作多多，其中新濠（200）停牌搞批股，至於銀河娛樂（027），因為傳聞美資賭業集團入股而勁升，就連日前提及的大同（544）都停埋牌，據講係同落實收購澳門金都酒店部份權益有關。
經紀黃話，銀娛與美資商討一事，查實講咗好耐。雖然昨日銀娛炒上13.1％，而且成交好大，但佢周圍問過，據聞入股一事仍然係只聞樓梯響，短期唔會咁快成事。
另外，大市近日成交雖然細咗，但好多早排受跌市影響而急跌嘅股仔，開始穩定落嚟及慢慢回升。
中國稀土（769）早前由2元高位跌落嚟，一度跌至1.13元，幾乎打回原形咁滯，但近日走勢明顯好番，昨日升3％，收1.36元。
經紀黃話，中國稀土早排有芬佬食糊沽貨，所以股價受壓，但公司一切如常，生意照做全無問題，其他芬佬知道冇事買番，股價自然由低位反彈。
慕容小初