Hea：U仔U女初下水　唉吔！返艇㖭！

Hea：U仔U女初下水　唉吔！返艇㖭！

今日係農曆五月初五端午節，除咗係公眾假期之外，基本上好多人同筆者嘅想法都係一樣……冇乜特別！每次起身扭開電視機都睇到龍舟賽事嘅直播，其實不如行多兩步去現場感受吓氣氛，嘩！一定娛樂無窮！唔講唔知，原來除咗龍舟仲有鳳艇呢家嘢，U界好多女仔今年仲係初次下海㖭，湊唔夠一隻鳳艇咩，咪整番隻「鴦鴛艇」囉！嗱，至於邊間U多索女，就要靠你眼力喇！

記者：許維雅
攝影：陳陶鈞
鳴謝：部份相片由赤柱龍舟協會提供（包括非賽會指派攝影師）

赤柱最熱鬧

■護士姐姐搞成咁，有人受傷都應該唔關佢事喇，你睇，都俾人抬咗去。

■現場有不少着得十分性感嘅女鼓手，要打鼓咁大動作，唔該着穩件泳衣呀！

■嘩！一灘都係三點式！

■嚟打氣嘅觀眾都令人大飽眼福。

■落船係威係勢，舉晒槳嗌晒咁款，好似充滿信心喎！

■現真身喇，一睇就知係初哥，各有各扒，想隻船去都難。

■游都懶，等船嚟救？大家誤會咗佢哋喇，原來佢哋唔捨得隻船，之但係工作人員都唔知點幫佢哋執番隻船！

■轉個頭，見到有人反艇沉船㖭！係咪想中途罷工唔使扒，游返上岸先？

全場至索黃克競之花

今日睇龍舟想緊張刺激，梗係去赤柱啦，一地都係三點式，雙眼食盡冰淇淋！但係如果想睇得特別少少，睇吓蝦碌鏡頭、有無人反艇、有無靚女、有無筋肉仔……咁就要坐定車去沙田霸定個靚位。因為沙田龍舟競賽係最多賽事嘅競賽地點，當中全部學界嘅比賽都係喺城門河舉行。唔係話啲學生無實力，不過好多都係第一次玩，斷估有得笑吓，唔玩得都睇得吖。

■黃克競之花Vivian，全場至索係佢，有陽光味又清純，好似賣緊檸檬茶廣告咁款。

■理工代表雖然個個白Tee加Cap帽，質素平均，但無一個標青都好，可以專心比賽。

■浸大今年出5條中龍11條鳳，以量取勝，總有靚女夾雜喺度。不過難搵少少，考眼力喇！

■初次下水嘅U女，個個都好騰雞，喺碼頭度攬埋一堆，唔肯落船都有。

■唔一定學生妹先有好嘢嘅，呢位就係路政署之花陳小姐：「做咗一年，今年第一年扒龍舟。唔難學，好好玩吖！」

■浸大代表，唔好講咁多，識揸住支槳擺Pose，都算好醒目吖。

醒你幾招扒龍舟

其實不少參賽者都係初次下水，睇練水已經笑料百出，有人撐極隻龍舟都去唔到，有啲曉行嘅就不斷兜圈，仲有人反艇沉船，極之搞笑。根據龍舟教練所講，原來龍舟分為大中細3種，愈細就愈易反艇，平衡力一定要好，一定要扒得齊！講講吓佢仲當場親自示範幾招，點樣可以扒得快，點樣可以慳力，即睇教練示範！

教練Tim示範扒龍舟

握槳方法：
■下手離槳葉一隻手位，上手抓住頂部嘅T字位。

■PatPat貼船邊，身向前，左腳向後擺，右腳撐住前面個位，利用上身嘅擺動，將槳推前。

■插入水中向後撥，撥到去膝頭哥位。

■將槳垂直拉起，以免撥得太後就會嘥力。之後再將身體向前壓重複動作。

即日賽事時間表

赤柱錦標賽
時間：8:00am-6:30pm
地點：赤柱正灘
查詢：28130564

香港仔競技大賽
時間：9:00am-4:00pm
地點：香港仔海濱公園海旁
查詢：81073488

沙田龍舟競賽
時間：8:00am-12:30pm
地點：沙田城門河
查詢：26941488

屯門區龍舟競賽
時間：8:00am-1:00pm
地點：屯門第44區青山灣避風塘
查詢：24526520

大埔區龍舟競賽
時間：8:30am-12:30pm
地點：大埔海濱公園堤畔
查詢：26648661

西貢區龍舟競渡
時間：8:30am-12:30pm
地點：西貢海旁近碼頭位置
查詢：27912601

丙戌年大澳區龍舟競渡賀端陽
時間：10:00am-2:00pm
地點：大嶼山大澳船隻碇泊保護區
查詢：29857229