作為一個導演，最鍾意睇人畀戲。任何人通過身體語言或對白去表達一些想表達的訊息，都要畀戲。畀戲唔一定係違心或不正義的，就算真心真意講出心底話，要產生感染力，都要畀戲。
曾特首最近幾肯畀戲，在某關於金融經濟的場合，曾特首用英文鬧班Banker，真係鬧喎，鬧班Banker喺政府為佢哋傾咗啲筍嘢嘅時候，一個二個淨係掛住唔係打哥爾夫就浸Spa做腳底按摩，搞到成個周末冇人去跟進，曾特首在講台上鬧到無名火起，又不失領導身份，畀嘅戲，一TakeOK。在另一場合中所講嘅「莫講話經濟，淨係污染指數都進步咗先喇」，用字與語氣生動有趣，莊諧並重。股市小爆煲前，曾特首又提醒市民入市要量力而為，嗒真啲就㗳得出曾特首已畀足戲嚟畀貼士，世界盃將至，曾特首重提波係圓嘅理論，睇波時除了要留意球員表現，更應懂得欣賞領隊嘅運籌帷幄。
有個別教友選擇罷看《達文西密碼》的首映場，曾特首卻去了捧首映場並說故事好吸引，那也是一種態度，畀足戲地告訴大家《達》片只是一個「故事」。
聽厭了沒承擔、沒骨氣、講了等於冇講的廢官腔，曾特首偶爾來幾句畀足戲兼有腰骨嘅說話，幾醒神。